Першай краінай, якая перайшла на сувязь 5G, стане Сан-Марына
5- 18.07.2017, 10:15
- 17,931
Сан-Марына разгорне сеткі пакалення 5G да канца 2018 года.
Сан-Марына стане першай краінай у свеце, якая разгорне сеткі 5G на ўсёй сваёй тэрыторыі. Як чакаецца, краіна пяройдзе на сеткі новага пакалення да канца 2018 г., паведамляе Інтэрфакс.
Сан-Марына з усіх бакоў акружаная тэрыторыяй Італіі. Мясцовы аператар сувязі Telecom Italia Mobile (TIM) мае намер выкарыстоўваць краіну ў якасці пляцоўкі для выпрабаванняў новай тэхналогіі.
У 2017 г. аператар падрыхтуе ў Сан-Марына асноўную інфраструктуру для пераходу на 5G.
TIM таксама праводзіць выпрабаванні ў Мілане і Турыне, але ў Сан-Марына менш нарматыўных абмежаванняў на выкарыстанне радыёчастотаў, чым у Італіі, што пашырае магчымасці кампаніі.
Паводле словаў тэхдырэктара TIM Джавані Ферыга, Еўропа мела галоўную ролю ў развіцці тэхналогіі 2G, але потым саступіла азіяцкім краінам у развіцці 3G і ЗША з 4G. "Разам з 5G мы маем намер вярнуць Еўропе лідарства ў стварэнні стандартаў", – сказаў ён.
Паводле ацэнак Еўракамісіі, якая ў 2016 годзе апублікавала стратэгію развіцця 5G, эканамічныя перавагі ад пераходу на новае пакаленне сетак складуць 113 млрд еўраў да 2025 г. Стварэнне інфраструктуры для іх у Еўропе запатрабуе ўкладанняў памерам 56 млрд еўраў і забяспечыць блізу 2,3 млн новых працоўных месцаў.
Раней паведамлялася, што да 2023 г. сувязь пакалення 5G будзе даступная на ўсёй тэрыторыі Японіі.