Незалежны прафсаюз дамогся расследавання надзвычайнага здарэння на гомельскім прадпрыемстве

Калі кіраўніцтва даведалася пра ўмяшанне прафсаюза РЭП, то паабяцала дапамогу пацярпелай і пачатак расследаванне.

Два тыдні ААТ «Дарбудмантажтрэст» СМП-354 (будаўніча-мантажны цягнік) на станцыі Гомель не мог пачаць расследаванне няшчаснага выпадку, які адбыўся ў працоўны час і на працоўным месцы з тынкоўніцай Надзеяй Буславай. Справа зрушылася з мёртвай кропкі пасля ўмяшання незалежнага прафсаюза супрацоўнікаў радыёэлектроннай прамысловасці (РЭП), працадаўца запрасіў да сябе супрацоўніцу, якая знаходзіцца на бальнічным, піша praca-by.info.

Пацярпелая распавяла, што 17 ліпеня была на прадпрыемстве, даведалася пра пачатак расследавання таго выпадку, з яе ўзялі тлумачальную паводле факта атрымання хімічнага апёку вока. Вядома, што пісьмовыя тлумачэнні ўзятыя і з іншых чальцоў брыгады тынкоўнікаў. Пасля заканчэння расследавання яе азнаёмяць з Актам формы Н-1 (акт пра няшчасны выпадак на вытворчасці).

«Я была ў кіраўніка прафсаюза на прадпрыемстве, мне абяцаюць прэмію, усе цікавіліся, як і дзе я знайшла незалежны прафсаюз РЭП, папракалі, чаму я не прыйшла па дапамогу ў іхні прафсаюз. Я адказала, што было два тыдні, каб пачаць разбірацца ў прычынах таго, што адбылося, і толькі пасля таго, як іншы прафсаюз выступіў у маю абарону, запатрабаваў правядзення расследавання, справа зрушылася з мёртвай кропкі», – распавяла пацярпелая працаўніца.

У незалежным прафсаюзе РЭП з радасцю ўспрынялі навіну пра распачатае расследаванне няшчаснага выпадку на вытворчасці і заяўляюць, што будуць адсочваць ягоныя вынікі да самага канца.

Прававы інспектар працы прафсаюза РЭП у Гомельскай вобласці Леанід Судаленка: «Будзем змагацца за вызначэння канкрэтных вінаватых у гэтай вытворчай траўме. Практыка паказвае, што наймальнікі імкнуцца пазбегнуць сваёй віны, перакладаючы адказнасць на саміх пацярпелых супрацоўнікаў. У залежнасці ад канкрэтнай віны кожнага з бакоў мы зробім канчатковыя высновы, што адбылося», – падкрэсліў прафсаюзны юрыст.

У прафсаюзе таксама распавялі, што ўсе наймальнікі страхуюць сваю адказнасць за жыццё і здароўе супрацоўнікаў. У залежнасці ад ступені страты працаздольнасці страхавая кампанія выплачвае пацярпеламу супрацоўніку ўсе належныя выплаты, пачынаючы ад аднаразовай, кошту неабходнага лячэння і заканчваючы пажыццёвымі штомесячнымі выплатамі ў выпадку неабходнасці. Калі вінаватым прызнаецца наймальнік, супрацоўнік мае права ставіць пытанне пра спагнанне маральнай шкоды.