У РФ прапануюць радыкальна змяніць жыццё курцоў

Расейцы асцерагаюцца, што новая антытытунёвая канцэпцыя павялічыць аб'ём кантрафактнай прадукцыі з Беларусі.

На сённяшнім пасяджэнні Федэральнай антыманапольнай службы РФ (ФАС) прэзэнтавалі дапрацаваны праект антытытунёвай канцэпцыі (Канцэпцыі ажыццяўлення дзяржаўнай палітыкі супрацьдзеяння спажывання тытуню на 2017-2022 гады Міністэрства аховы здароўя РФ). З праекта дакумента былі прыбраныя некаторыя тэзісы, якія выклікалі грамадскі розгалас. Так, як піша «РІА Новости» са спасылкай на начальніка кантрольна-фінансавага управы ФАС Уладзіміра Мішаловіна, з праекта знікла прапанову падаўжаць працоўны дзень курцам на той час, які яны марнуюць на перакуры, паведамляе РБК.

Пры гэтым большасць пунктаў, якія яшчэ на этапе падрыхтоўкі да абмеркавання дапрацаванага праекта былі раскрытыкаваныя федэральнымі ўстановамі і тытунёвымі кампаніямі, засталіся нязменнымі, распавялі ўдзельнікі пасяджэння. Прадстаўнік Міністэрства фінансаў Расеі, сярод іншага, раскрытыкаваў прапанову Міністэрства аховы здароўя павысіць падатковую ціск на тытунёвую галіну. Са слоў намесніцы дырэктара дэпартамента падатковай і мытнай палітыкі Мінфіна Вольгі Цібізавай, на якую спасылаецца «Інтэрфакс», канцэпцыя Міністэрства аховы здароўя прадугледжвае бесперапыннае паэтапнае павышэнне ставак акцызаў на тытунёвыя вырабы да сярэдняга ўзроўню падаткаабкладання сярод краін еўрапейскага рэгіёну САЗ.

«Павелічэнне ставак акцызу да прапанаванага ўзроўню знізіць аб'ём кантрафактнай прадукцыі, якая паступае цяпер у еўрапейскія краіны, што мяжуюць з РФ. Але, у той жа час, гэта можа прычыніцца да павелічэння аб'ёму кантрафактнай прадукцыі на самой тэрыторыі Расеі. Той кантрафактнай прадукцыі, якая паступае, сярод іншага, з дзяржавы-члена Мытнага саюза Рэспублікі Беларусь, у якой стаўкі акцызу значна ніжэйшыя, чым у РФ», - цытуе агенцтва Цібізаву.

Засталася ў праекце і прапанова аб нівеляванні пачкаў цыгарэт. Згодна з гэтым пунктам канцэпцыі, на пачках застануцца толькі назвы марак, усе астатнія элементы - лагатыпы, спецыяльныя шрыфты, колеры - знікнуць. Са слоў дырэктара «РусБренда» Аляксея Паповічава, дэбрэндынг пачкаў наўрад паўплывае на спажыўцоў, якія ўжо паляць - іхняя звычка ўжо сфармавалася. Што да магчымых новых прыхільнікаў курэння, то яны і так абароненыя параўнальна нядаўнімі навацыямі - напрыклад, папераджальнымі малюнкамі на пачках цыгарэт, заслоненымі вітрынамі, забаронай на рэкламу цыгарэт і г.д. «Таму гэтыя захады можна назваць залішнімі», - кажа экспэрт.

Пачак ніколі не з'яўляўся для непаўналетніх стымулам пачаць курыць, а для дарослых - працягваць, дадае дырэктар дэпартамента ў юрыдычных пытаннях і сувязях з грамадскасцю «Імперыял Табака продаж і маркетынг» (уваходзіць у Imperial Tobacco) Андрэй Рогаў (цытата паводле «Ведомости»).

Іншыя экспэрты мяркуюць, што нівеляванне пачкаў цыгарэт можа прычыніцца да павелічэння нелегальнай, няякаснай прадукцыі на рынку. «У Аўстраліі, якая першая ў 2012 годзе ўвяла уніфікаваны пачак тытунёвых вырабаў, гэтыя захады не зрабілі ніякага ўплыву на дасягненне заяўленых урадам мэт скарачэння курэння і зніжэння даступнасці цыгарэт. Разам з тым, паводле звестак даследаванняў KPMG, дзель нелегальнага рынку цыгарэт вырасла ў Аўстраліі на 21%. Гэта цалкам вытлумачальна, бо падрабляць стандартны пачак значна прасцей, чым брэндаваны, у які вытворцы закладваюць розныя элементы абароны. Акрамя таго, дзель танных цыгарэт на рынку Аўстраліі павялічылася - з 59% у 2011 годзе да 72% у 2015 годзе», - падае прыклад віцэ-прэзідэнт ў карпарацыйных стасунках і камунікацыях JTI ў Расеі Сяргей Кісялёў.