Беларускія добраахвотнікі звярнуліся да прэзідэнта Украіны
15- 20.07.2017, 8:23
- 32,484
Тактычная група «Беларусь» звяртаецца да ўрада і грамадскасці Украіны.
20–21 ліпеня Аляксандр Лукашэнка наведае Кіеў. Дэлегацыю, якая сустрэнецца з кіраўніком Беларусі, беларусы з АТО просяць падняць у перамовах з ім пяць пытанняў.
Зварот тактычная група даслала сайту Charter97.org. Добраахвотнікі заклікаюць:
– Спыніць крымінальны пераслед беларускіх добраахвотнікаў, якія змагаюцца на баку Украіны;
– Даць прававую ацэнку наймітам-грамадзянам Беларусі, якія ў шэрагах злачынных груповак ЛНР і ДНР ваююць на тэрыторыі Украіны, і спыніць дзейнасць у Беларусі арганізацыяў, якія займаюцца вярбоўкай і падрыхтоўкай наймітаў;
– Скасаваць «чорныя спісы» на мяжы, праз якія народныя дэпутаты, грамадскія дзеячы, журналісты, прадстаўнікі творчых элітаў Украіны не могуць наведаць Беларусь;
– Даць дазвол на трансляцыю ў тэлевізійных сетках Беларусі ўкраінскіх тэлеканалаў і трансляцыю ўкраінскіх фільмаў пра рэвалюцыю годнасці і расейска-ўкраінскую вайну на беларускіх каналах;
– Спыніць правакацыі, ціск і пераслед сваякоў беларусаў, якія аддалі сваё жыццё за незалежнасць Украіны: Героя Украіны Міхаіла Жызнеўскага і байца тактычнай групы «Беларусь» Аляксандра Чаркашына.
Байцы перакананыя, што рэалізацыя гэтых 5 пунктаў «узмоцніць Украіну і прывядзе да паляпшэння беларуска-ўкраінскіх стасункаў».