Генпракуратура змусіла міністра культуры да адказнасці

Барыс Святлоў будзе пакараны за слабы кантроль над гістарычнымі помнікамі.

Генеральная пракуратура Беларусі правяла праверку выканання заканадаўства, якое рэгулюе парадак ажыццяўлення прадпрымальніцкай дзейнасці на аб'ектах гісторыка-культурнай спадчыны.

«За слабы кантроль за аб'ектамі гісторыка-культурнай спадчыны змушаны да дысцыплінарнай адказнасці міністр культуры Барыс Cвятлоў», – паведамляецца на сайце ўстановы.

У мэтах стварэння належных умоваў захаванасці, аднаўлення, утрымання і выкарыстання гісторыка-культурных каштоўнасцяў указам № 527 "Аб некаторых пытаннях аховы гісторыка-культурнай спадчыны" вызначаны парадак ажыццяўлення юрыдычнымі (фізічнымі) асобамі, у тым ліку індывідуальнымі прадпрымальнікамі, адлічэнняў за прадпрымальніцкую дзейнасць, якая непасрэдна ўздзейнічае на гісторыка-культурную каштоўнасць, і выплаты кампенсацыяў за шкоду, прычыненую такім каштоўнасцям. Адлічэнні варта рабіць штогод ад прыбытку пры ажыццяўленні дзейнасці, якая непасрэднае ўздзейнічае на гісторыка-культурную каштоўнасць.

Нярэдка на фасадах і дахах будынкаў-помнікаў усталёўваюць расцяжкі, прамысловыя кандыцыянеры, прылады электрасувязі.

Як паказала праверка, адлічэнні мелі адзінкавы характар і не былі звязаныя з рэалізацыяй нормаў заканадаўства.

Для ліквідацыі парушэнняў Генпракуратура накіравала адпаведную інфармацыю ў Савет міністраў.

Вызначаны суб'екты гаспадарання, дзейнасць якіх непасрэдна ўздзейнічае на аб'екты гісторыі і культуры – усяго такіх больш за 2 тысячы.

Штрафныя санкцыі пракуратуры далі магчымасць накіраваць на аднаўленне помнікаў гісторыка-культурнай спадчыны больш за 400 тысячаў рублёў. У параўнанні з мінулым годам аб'ём сродкаў павялічыўся ў 16 разоў.

Сродкі, сярод іншага, накіраваныя на фінансаванне капітальнага рамонту Свята-Барыса-Глебскай (Каложскай) царквы ў г. Гродне, кансервацыі Княжацкай вежы гісторыка-культурнай каштоўнасці «Рэшткі замка XIV ст. у в. Крэва Смаргонскага раёна», рэстаўрацыі фрэскавых роспісаў XII ст. Спаса-Праабражэнскай царквы ў г. Полацку.

Раней паведамлялася, што сродкі на гэтыя аб'екты вылучаныя з фонду Лукашэнкі.