Менскія чыноўнікі далучылі Гаяну да Венесуэлы
8- 20.07.2017, 18:15
- 13,390
На мемарыяльнай шыльдзе ў менскім парку выгравіравалі абрыс краіны, якой няма ні ў адным атласе свету.
Уважлівы чытач даслаў у рэдакцыю nn.by фота з менскага парку імя Чавэса.
На мемарыяльнай шыльдзе, акрамя тэксту, размешчаныя абрысы краіны, якой няма ні ў адным атласе - на гэта і звярнуў увагу чытач.
Але высветлілася, што гэта Венесуэла з далучанай да яе Гаянай - англамоўнай краінай у Лацінскай Амерыцы.
Венесуэла мае тэрытарыяльныя прэтэнзіі да яе праз рэгіён, багаты на залата, але забраць гэтую тэрыторыю не можа (а гэта 5/8 ад Гаяны).
Мы спыталі ў пасольстве Венесуэлы, ці яны ініцыятары такога дызайну. Тыя адказалі, што так, бо ўважаюць пазначаныя вобласці за сваю тэрыторыю.
Ці з'яўляецца гэта афіцыйнай пазіцыяй Беларусі аб тэрытарыяльным спрэчцы Гаяны і Венесуэлы, нам высветліць не ўдалося - у прэс-службе Менгарвыканкама не здолелі знайсці аўтара шыльды.
Сказалі толькі, што ўзгадненнем займаецца звычайна камісія пры раённай адміністрацыі - у гэтым выпадку адміністрацыя Фрунзенскага раёна сталіцы.