«Не захацелі, каб я распавёў усё як ёсць»

Як жыхар Ляхавічаў спрабаваў патрапіць на прыём да спадара Мясніковіча.

Старшыня «Савета рэспублікі» Міхаіл Мясніковіч 20 ліпеня праводзіў у Ляхавічах прыём грамадзян. Задаць свае пытанні чыноўніку змаглі не ўсе ахвотныя. Сярод іх - мясцовы жыхар Уладзімір Пяшкур, які спадзяваўся на дапамогу Мясніковіча ў развязанні сваёй праблемы, але не змог нават запісацца на прыём, піша intex-press.by.

59-гадовы Уладзімір Пяшкур, жыхар Ляхавічаў, звярнуўся ў рэдакцыю выдання, каб распавесці, як яму - простаму чалавеку, ужо некалькі гадоў не ўдаецца дастукацца да ўладаў са сваёй праблемай. Ён не першы год спрабуе развязаць пытанне аб сваёй пенсіі і стажы работы. Уладзімір распавядае, што больш як 31 год прапрацаваў майстрам у КПК, і спадзяваўся на датэрміновую пенсію. Але, паводле ягоных слоў, праз няправільны запіс у працоўнай кніжцы раней сысці на пенсію яму не ўдалося, а па дасягненню агульнапрынятага пенсійнага ўзросту (у яго выпадку - 61 год), мужчына зможа разлічваць толькі на невялікую пенсію, а не на тую, на якую ён разлічваў. Звароты ў розныя інстанцыі (суд, федэрацыю прафсаюзаў і іншыя) і да дэпутатаў Уладзіміру не дапамаглі.

У суботу, 15 ліпеня, з мясцовай газеты ён даведаўся, што 20 ліпеня ў Ляхавічы прыязджае старшыня «Савета рэспублікі» Міхаіл Мясніковіч і будзе праводзіць у райвыканкаме прыём грамадзян. Ва Уладзіміра з'явілася надзея, што нарэшце развязаннем ягонага пытання зоймуцца, і ў аўторак, 18 ліпеня, ён патэлефанаваў на пазначаны ў газеце нумары тэлефона, каб запісацца на прыём.

- Калі я прадставіўся, мне сказалі, што запіс скончыўся, - распавядае ён. - Яны мяне ведаюць, і, мабыць, проста не захацелі, каб я распавёў усё як ёсць - як простаму чалавеку немагчыма абараніць свае правы, давесці нешта.

20 ліпеня, калі Міхаіл Мясніковіч прыехаў у Ляхавічы, Уладзімір Пяшкур ўсё ж надумаў падысці да будынка райвыканкама з надзеяй на тое, што сустрэцца са старшынём «Савета рэспублікі» яму ўсё ж удасца.

- Але я нават не патрапіў у будынак райвыканкама, дзе Мясніковіч праводзіў прыём, - распавядае мужчына. - Падышоў да ўваходу, гляджу: міліцыя адводзіць дзядзьку, які таксама хацеў нешта спытаць у старшыні «Савета рэспублікі». Я і спыніўся, мне толькі праблем з міліцыяй бракавала.

«Для прыёму і трох дзён бы не выстарчыла»

У Ляхавіцкай райвыканкаме сказалі, што Уладзіміра Пяшкура не запісалі на прыём да спадара Мясніковіча, бо ахвотных задаць яму пытанні было вельмі шмат, а час прыёму быў абмежаваны.

- Запіс пачаўся ў панядзелак, і за тры гадзіны запісалася больш як 15 чалавек, а Міхаіл Мясніковіч да нас прыязджаў толькі на адну гадзіну, - распавялі ў Ляхавіцкім райвыканкаме. - Калі б мы запісвалі ўсіх ахвотных, напэўна, для прыёму і трох дзён не выстарчыла б.

У райвыканкаме сказалі, што на прыём да спадара Мясніковіча прыйшлі не ўсе, хто запісаліся, а 7-8 чалавек - у астатніх «пытанні развязаліся да прыезду» старшыні «Савета рэспублікі».

Паводле інфармацыі ж БелТА на прыём да спадара Мясніковіча прыйшлі толькі пяць чалавек. Прычым, Міхаіл Мясніковіч, адказваючы на пытанні аб эфектыўнасці асабістых прыёмаў грамадзян заявіў, што мясцовыя органы ўлады павінны працаваць больш адказна.

- З аднаго боку, каб прымаць правільныя кіроўныя пастановы, трэба ведаць сітуацыю непасрэдна з першых вуснаў. Але ў той жа час я паглядзеў запіс да мяне на прыём і мяркую, што практычна ўсе гэтыя пытанні можна развязаць на мясцовым узроўні. Некаторыя кіраўнікі не прымаюць пастановы, баяцца браць на сябе адказнасць. Праз гэтага людзі ходзяць па коле або змушаны звяртацца ў вышэйшыя органы. Усё ж такі кадры на месцах павінны працаваць больш актыўна, адказна, - цытуе Міхаіла Мясніковіча БелТА.

Уладзімір Пяшкур ужо не верыць у тое, што простаму чалавеку можна дастукацца да ўладаў.

- Звычайным людзям спрабаваць нешта давесці, абараніць свае правы бескарысна, - кажа ён. - падмануць і нават слухаць не стануць. А потым кажуць, што ўлада для народа.