Жыхарка Бабруйска абвясціла галадоўку

Суд пакараў яе за ўдзел у неісным мітынгу.

Жанчына паспрабавала абскардзіць пастанову суду і давесці, што мітынг, у якім яна нібыта ўдзельнічала, напраўду не праводзіўся. Але не тут-та было.

«Салідарнасць» ужо пісала пра абсурдную гісторыю, у якую патрапіла 65-гадовая жыхарка Бабруйска Любоў Санкевіч.

Не пагадзіўшыся з пастановай суда, жанчына паспрабавала абараніць свае правы праз суд. І сутыкнулася з «асаблівасцямі» працы беларускай судовай сістэмы.

Як высветлілася, за кожную інстанцыю, у якой жанчына хацела абскардзіць несправядлівую пастанову суда, ёй трэба было заплаціць дзяржаўную мыту сумай 46 рублёў.

- Атрымліваецца, што цяпер пенсіянерцы, якая атрымлівае 180 рублёў пенсіі, трэба на кожным этапе плаціць мыту, калі яна бароніць свае правы ў судзе. Напрыклад, калі яна захоча дайсці са сваёй справай да старшыні Вярхоўнага суда, каб расказаць яму, як працуюць беларускай суддзі, то ёй давядзецца заплаціць 184 рублі! - пракаментавала сітуацыю юрыст Тамара Сяргей.

На думку праваабаронцы, такім чынам, дзяржава пазбаўляе чалавека права на судовую абарону ў поўным аб'ёме.

Тым больш, што Любоў Санкевіч звярталася да абласнога пракурора, а таксама ў суд Магілёўскай вобласці з просьбай дазволіць ёй не плаціць мыту - на што двойчы атрымала адмову.

- Любоў Міхайлаўна заявіла, што будзе вымушаная выходзіць на акцыю пратэсту ў выглядзе галадоўкі, - папярэдзіла Тамара Сяргей.

Нагадаем, раней пенсіянерку прыцягнулі да адказнасці за ўдзел у неісным мітынгу, які нібыта прайшоў 25 сакавіка на плошчы Незалежнасці ў Менску.