Беларусам давядзецца перайсці на танны алкаголь і «самакруткі»

Падаражанне акцызаў і іншыя нечаканкі ад «падаткавікоў».

У апублікаваным Мінфінам праекце дапаўненняў і змяненняў у Падатковы кодэкс утрымліваецца шэраг новаўвядзенняў у ПДВ і акцызах, якія могуць з'явіцца ў наступным годзе. «Экономическая газета» разгледзела асноўныя з іх:

Галоўнае расчараванне: мяркуючы з усяго, бізнэс-звязы не дамагліся вяртання права прызнаваць момант фактычнай рэалізацыі для вылічэння ПДВ «паводле аплаты». Для большасці плацельнікаў (акрамя вытворцаў алкаголю) захаваецца адзіны метад прызнання выручкі «паводле адгрузкі». Якія праблемы яны ні адчувалі б, налічваць і плаціць падаткі суб'ектам гаспадарання давядзецца незалежна ад таго, ці разлічыліся пакупнікі з імі, ці не.

Электронныя рахункі-фактуры

У гэтым годзе плацельнікам давялося ў асноўным асвоіцца з выкарыстаннем электронных рахункаў-фактураў. Пры гэтым практыка паказала неабходнасць унясення даволі істотных карэктаванняў у механізм выкарыстання электроннага рахунку-фактуры (ЭРФ). Сярод іншага, заканадаўцы плануюць змяніць у некаторых выпадках тэрміны іх выстаўлення.

Так, у праекце прапануецца перанесці тэрмін выстаўлення ЭРФ да 20-й даты месяца (г. зн. да тэрміну падачы падатковай дэкларацыі) пры здзяйсненні аперацыяў, калі ЭРФ выстаўляецца толькі на Партал без накіравання на адрас пакупніка. Гэта стане магчымым, сярод іншага, пры вылічэнні ПДВ пры набыцці аб'ектаў на тэрыторыі РБ у нерэзідэнтаў, а таксама пры ўвозе тавараў, пры рэалізацыі экспартаваных тавараў і транспартных паслуг. Такім чынам, прапанова бізнэс-звязаў павялічыць тэрмін выстаўлення ЭРФ для ўсіх рэалізаваная толькі часткова. Раней прадстаўнікі падатковых органаў заяўлялі, што павялічыць тэрміны для накіравання ЭРФ немагчыма, паколькі гэта перашкодзіць контрагентам своечасова зрабіць падатковы вылік у падаванай падатковай дэкларацыі. Развязаць гэтую праблему мог бы дазвол зрабіць ЭРФ аднабаковым. Але на такі радыкальны крок аўтары праекту пайсці не рызыкнулі.

Збольшага кампенсаваць гэта могуць іншыя паслабленні. Так, прапануецца скасаваць налета абавязак ствараць і выстаўляць ЭРФ пры ўвозе тавараў, якія вызваляюцца ад «увознага» ПДВ, а таксама пры аперацыях з бязвыплатнай перадачай маёмасці, якія ўсё роўна не абкладаюцца ПДВ. Магчыма, будзе рэалізаваная прапанова вызначыць у п. 111 арт. 1061 ПК выпадкі, калі можна выстаўляць дадатковы ЭРФ без спасылкі на зыходны або выпраўлены.

Прапануецца ўвесці абавязкі выстаўляць на Партал ЭРФ пры рэалізацыі фізічным асобам аб'ектаў, якія вызваляюцца ад ПДВ, са стварэннем аднаго выніковага ЭРФ за справаздачны перыяд. Гэта павінна ліквідаваць адхіленні пры камеральным кантролі пры зверцы падатковай базы, якая вызваляецца ад ПДВ, з звесткамі выстаўленых ЭРФ.

Спецыяльна для СМІ і іх падпісчыкаў плануецца ўнесці ў ПК норму, якая рэгламентуе асаблівасці стварэння ЭРФ рэдакцыямі для перыядычных выданняў, што рэалізуюцца праз падпіску праз аператара паштовай сувязі. Тут можна будзе ствараць адзін выніковы ЭРФ за каляндарны месяц, накіроўваны на адрас аператара. У выпадку, калі падпісантамі з'яўляюцца фізічныя асобы (індывідуальная падпіска), ЭРФ будзе выстаўляцца толькі на Партал.

Падарунак для ІП

Яшчэ адным крокам у «дэдалярызацыі» эканомікі стане замена ліміту выручкі і прыбыткаў для індывідуальных прадпрымальнікаў, якія прызнаюцца плацельнікамі ПДВ, з цяперашніх 40 000 EUR да 90 000 BYN (нарастальным вынікам з пачатку года без уліку падаткаў і збораў, што выплачваюцца з выручкі). Праўда, курс еўра можа згуляць з прадпрымальнікамі злы жарт: калі ён вырасце, то імавернасць патрапіць у лік плацельнікаў ПДВ павялічыцца.

У дадатак п. 9 арт. 63 ПК дапаўняецца нормай, згодна з якой індывідуальнымі прадпрымальнікамі, якія прызнаюцца плацельнікамі ПДВ, давядзецца падаваць падатковую дэкларацыю ў гэтым падатку незалежна ад наяўнасці альбо адсутнасці аб'ектаў падаткаабкладання ў справаздачным перыядзе, з якога імі прынятая пастанова пра выплату ПДВ. Нагадаем, што плацельнікі ПДВ паводле ч. 2 п. 4 арт. 63 ПК абавязаныя падаваць у падатковы орган падатковыя дэкларацыі (разлікі) толькі ў выглядзе электроннага дакумента. Так што некаторым ІП давядзецца папоўніць шэрагі плацельнікаў, якія далучаныя да электронных сэрвісаў.

Льготы

Заканадаўцы ідуць за стратэгічнай мэтай удасканалення падатковай палітыкі – скарачэннем падатковых ільготаў. На гэты раз у поле іх зроку апынулася прадугледжанае арт. 94 ПК вызваленне ад ПДВ абаротаў у рэалізацыі паслуг, што робяцца фізічным асобам у прыёме падпіскі на друкаваныя СМІ і іх дастаўцы, а таксама паслуг паштовай сувязі ў перасылцы пасылак і (або) грашовых пераводаў, прынятых ад фізічных асобаў аператарамі паштовай сувязі для дастаўкi (уручэння) адрасату. Пры гэтым тарыфы на паслугі паштовай сувязі павінны вызначацца аператарамі асобна для фізічных і юрыдычных асобаў. Таму на ІП, якія заключылі дамову (якія ажыццяўляюць гаспадарчыя аперацыі) з аператарамі сувязі, не павінны распаўсюджвацца льготы ў пазначаных паслугах, прадугледжаныя для фізічных асобаў. Для гэтага ў падп. 1.21 і 1.49 п. 1 арт. 94 ПК прапануецца ўнесці абмежаванні, якія выключаюць магчымасць выкарыстання вызвалення ад ПДВ у дачыненні да ІП, якія з'яўляюцца пасярэднікамі пры аказанні паслуг, а фактычнымі заказчыкамі выступаюць юрыдычныя асобы.

Плануецца ўдакладніць, што стаўка ПДВ памерам 25% павінна ўжывацца не толькі пры рэалізацыі паслуг электрасувязі, але і пры павелічэнні падатковай базы пры рэалізацыі такіх паслуг, звязаных з вызначэннем моманту фактычнай рэалізацыі, атрыманнем сумаў больш за кошт рэалізацыі, у выглядзе санкцыяў за парушэнне пакупнікамі (заказчыкамі) умоваў дамоваў, дадатковай выгоды за рэалізаваныя камісіянерам паслугі на ўмовах больш выгодных, чым названыя камітэнтам.

Адначасова ў праекце прадугледжанае вызваленне ад ПДВ у дачыненнi да паслуг у падрыхтоўцы клінічных ардынатараў. На думку распрацоўнікаў, гэта дазволіць установам, якія робяць такія паслугі, накіроўваць вызваленыя грашовыя сродкі на ўмацаванне матэрыяльна-тэхнічнай базы, стварыць перадумовы для павышэння якасці навучання і павялічыць аб'ём экспарту гэтых паслуг.

Акцызы

Традыцыйна штогод мяняюцца стаўкі акцызаў. У наступным годзе іх прапануецца павялічыць на моцныя алкагольныя напоі, віны пладовыя мацаваныя на 3,5% да ўзроўню II паўгоддзя г.г., на піва ў залежнасці ад моцы – з 0,35 на лёгкае піва і піўны кактэйль і 0,74 BYN/л на моцнае піва да 0,36 і 0,77 BYN/л, г. зн. на 2,9% і 4,1% адпаведна. Паэтапна (паўгоддзямі) плануецца павялічыць на 7% стаўкі акцызаў на іншыя віды алкагольнай прадукцыі. Адначасова з улікам практыкі выкарыстання Указа Прэзідэнта ад 04.25.2015 №173 прадугледжваецца замацаваць у п. 1 арт. 114 ПК вызваленне ад акцызаў алкагольных напояў, піва і тытунёвых вырабаў, што рэалізуюцца вытворцамі уладальнікам крамаў бязмытнага гандлю для наступнай рэалізацыі ў такіх крамах.

Істотна могуць вырасці стаўкі акцызаў на тытунёвыя вырабы: на 15% паводле ўсіх коштавых групаў (паэтапна – паўгоддзямі). Таксама ў 2 этапы павялічацца на 10% стаўкі акцызаў на аўтамабільнае паліва і на 7% – на газ, які выкарыстоўваецца ў якасці аўтапаліва, аліву для дызельных і (або) карбюратарных (інжэктарных) рухавікоў.

Цікавым новаўвядзеннем стане дадатак падп. 2.7 п. 2 арт. 111 ПК нормай, згодна з якой не будзе налета называцца падакцызнай прадукцыяй збожжавы дыстылят. Так што ў самагоншчыкаў у прамысловым маштабе з'явіцца падстава адзначыць змены падатковага заканадаўства.