Нямеччына прапанавала пашырыць санкцыі супраць Расеі
2- 24.07.2017, 15:24
- 32,155
У абноўлены санкцыйны спіс Еўразвяза могуць быць уключаныя чыноўнікі Мінэнэргетыкі РФ.
Нямеччына прапанавала ўнесці ў санкцыйны спіс Еўразвяза яшчэ некалькі расейскіх кампаніяў і фізічных асобаў, якія звязаныя з пастаўкамі турбінаў нямецкай кампаніі Siemens у анэксаваны Крым, паведамляе Reuters (пераклад – gordonua.com) са спасылкай на дыпламатычныя крыніцы.
Адзін з суразмоўцаў агенцтва заявіў, што ў санкцыйны спіс могуць быць уключаныя чыноўнікі Міністэрства энэргетыкі Расеі і кампаніі, якія незаконна даставілі турбіны Siemens у Крым.
Іншая крыніца Reuters паведаміла, што пытанне пра пашырэнне санкцыяў супраць Расеі праз турбіны ў Крыме краіны ЕЗ могуць абмеркаваць 26 ліпеня.
5 ліпеня паведамлялася, што дзве турбіны вытворчасці Siemens прыбылі ў порт акупаванага Севастопаля. Яны нібыта прызначаныя для выкарыстання на будучай электрастанцыі ў гэтым горадзе.
6 ліпеня кампанія Siemens заявіла, што не пастаўляла турбіны ў Крым, а на наступны дзень паведаміла пра стварэнне працоўнай групы, якая зоймецца расследаваннем інцыдэнту.
21 ліпеня ў Siemens заявілі, што ў Крым былі незаконна перамешчаныя чатыры іх газатурбінныя ўстаноўкі, пастаўленыя летам для электрастанцыі ў Тамані.
Кампанія падала ў суд пазовы ў справе пра пастаўкі газавых турбінаў у Крым. Яна таксама заявіла, што ініцыявала працэс спынення ліцэнзійнага пагаднення з расейскімі кампаніямі ў галіне паставак абсталявання для парагазавых электрастанцыяў.
Расея будуе дзве электрастанцыі агульнай магутнасцю 940 МВт у анэксаваным Крыме, што павінна ўзмацніць энэрганезалежнасць паўвострава. Увесці адну з іх у эксплуатацыю планавалася да канца 2017 года. Аднак будаўніцтва было прыпыненае ў сувязі з тым, што Расея самастойна не вырабляе газавыя турбіны вялікай магутнасці.
Санкцыі Еўразвяза забараняюць еўрапейскім кампаніям прадаваць тэхналогіі і матэрыялы для энэргетычнага сектару Крыма.