Віцябляніна аштрафавалі на $950 за сарваны чырвона-зялёны сцяг
14- 24.07.2017, 19:45
- 24,925
Інцыдэнт адбыўся 2 траўня.
Суд вынес прысуд віцябляніну, які ў траўні сёлета пашматаў і кінуў пад ногі лукашэнкаўскі сцяг Беларусі. За здзек з «дзяржаўнага» сімвала ягамосць атрымаў штраф - 1840 рублёў (80 базавых адзінак), паведамілі tut.by у судзе Першамайскага раёна Віцебска.
Нагадаем, увечары 2 траўня 44-гадовы мужчына быў п'яны, але наважыў яшчэ купіць трункаў. Зайшоў у адну з харчовых крам на праспекце Чарняхоўскага. Кампанію яму склала знаёмка. Як пазней высветлілі следчыя, напярэдадні паміж імі адбыўся канфлікт.
Выйшаўшы з крамы, пакупнік заўважыў сцяг, які вывесілі ля галоўнага ўваходу ў гонар 1 траўня і дня перамогі. Мужчына пацягнуў за палотнішча і падраў яго, затым вырваў тронак з мацавання. Пасля гэтага кінуў «дзяржаўны» сімвал сабе пад ногі. Зайшоў за рог будынка, але неўзабаве вярнуўся, забраў сцяг і ўцёк.
Праваахоўнікі знайшлі ўцекача. Каля крамы падабралі дзяржальна, а ў кватэры знаёмкі мужчыны выявілі палотнішча сцягу.
Пракуратура Віцебска распачала крымінальную справу паводле арт.370 КК (Здзек з дзяржаўных сімвалаў).
Суд аштрафаваў ягамосця на 2300 рублёў (100 базавых адзінак), але раз ён два дні знаходзіўся пад вартай, то суму штрафу паменшылі да 80 базавых адзінак. Прысуд не ўвайшоў у законнае дзеянне.
У 2016 годзе справы гэтай катэгорыі ў краіне не распачыналі, у 2017-м - гэта першы такі выпадак.