У Менску на МКАД грузавік сутыкнуўся з рэйсавым аўтобусам

У выніку аварыі пацярпеў кіроўца аўтобуса.

Аварыя адбылася каля шостай гадзіны раніцы ў Першамайскім раёне Менска – паміж Лагойскім трактам і праспектам Незалежнасці на ўнутраным кальцы МКАД. Аўтобус № 86 рухаўся на маршрут. У аўтобусе знаходзіўся толькі кіроўца. На месцы працуе ДАІ.

– Аварыя адбылася на 53-м кіламетры ўнутранага кальца МКАД – паміж Лагойскім трактам і праспектам Незалежнасці, – распавяла tut.by cтарэйшая інспектарка ў агітацыі АДАІ Першамайскага РУУС горада Менска Аксана Мяхедка. – Аўтобус рухаўся ў першай паласе з боку Лагойскага тракту ў бок вуліцы Усіхсвяцкай, ззаду ехаў грузавік Scania, вяртаўся з рэйса з Літвы, гружаны воцатам. Кіроўца, з ягоных словаў, страціў увагу, а калі зноў звярнуў увагу на дарогу, да аўтобуса заставалася пяцьдзясят метраў.

Кіроўца фуры ўжыў экстранае тармажэнне, але пазбегнуць сутыкнення не атрымалася. Ад удару аўтобус выкінула за межы праезнай часткі.

Кіроўцу аўтобуса забрала брыгада хуткай з падазрэннем на ЧМТ, аднак, як толькі што стала вядома, ён адпушчаны дадому, дыягназ не пацвердзіўся.