У Кіеве праходзіць акцыя пратэсту прыхільнікаў Саакашвілі

Мітынгоўцы ўступілі ў бойку з паліцыяй.

У Кіеве праходзіць акцыя пратэсту, арганізаваная рухам Міхаіла Саакашвілі «Рух новых сіл». Як паведамляе Украінская служба «Радыё Свабода», у акцыі бяруць удзел блізу 400 чалавек.

Мітынгоўцы з Майдана Незалежнасці прыйшлі да Адміністрацыі прэзідэнта патрабаваць указ аб спыненні ўкраінскага грамадзянства Міхаіла Саакашвілі, пра гэта паведамляе з Банкавай карэспандэнт «Украінскай праўды».

Прыхільнікі Саакашвілі пад парканам крычаць «Банду прэч!».

Нехта ў рупар крыкнуў: «Калі не прапусціце, мы будзем прарывацца».

Удзельнікі акцыі паспрабавалі «штурмаваць» агароджу, але прарвацца ім не ўдалося.

На Майдане мітынгоўцаў не засталося.

На вуліцы перад АП размешчаная аб'ява, што праз рамонтныя работы праход 27 ліпеня па ёй зачынены.

Пасля дзвюх спроб прарвацца ў адміністрацыю прэзідэнта, блізу 15:50, дзесяць чалавек на чале з народным дэпутатам Юрыем Дзеравянкам усё ж упусцілі. Яны пайшлі прасіць копію ўказа.

Падчас акцыі пацярпела машына: з яе знялі нумарны знак і далучылі да звароту «Пётр».

Таксама падчас сутычкі актывісты разбурылі частку турнікета.

Напярэдадні Саакашвілі пазбавілі грамадзянства Украіны. У «Руху новых сіл» заявілі, што такім чынам «ўлада канчаткова скінула маскі». У руху пры гэтым сцвярджаюць, што сённяшняя акцыя на Майдане праходзіць не ў падтрымку Саакашвілі, а супраць таго, што кіраўніцтва краіны нібыта ігнаруе правы грамадзян.

Саакашвілі да 2013 года быў прэзідэнтам Грузіі. Украінскі пашпарт ён атрымаў у траўні 2015 года, стаўшы кіраўніком Адэскай вобласці. У лістападзе 2016 года Саакашвілі пакінуў гэтую пасаду. Пастанову аб адстаўцы палітык патлумачыў немагчымасцю справіцца з карупцыяй у рэгіёне, якую, як ён сцвярджае, «асабіста падтрымлівае» прэзідэнт краіны Пятро Парашэнка.

Пасля пазбаўлення грамадзянства Саакашвілі заявіў пра намер прадоўжыць барацьбу «за рэформы ва Украіне».