Што не так з беларускімі турфірмамі?

Лета ў беларускай турыстычнай галіны выдарылася гарачым.

Два скандальныя выпадкі за адзін месяц - гэта нават занадта для нашага невялікага рынка. На пачатку ліпеня гучна збанкрутавала «Каліпса Тур». Усё адбывалася паводле «бліскучай» расейскай схемы: нявылеты, раз'юшаныя кліенты ля канторы, крымінальная справа, арышт, піша tio.by.

А даслоўна днямі - чарговы скандал. Турфірма «Дром-тур» не здолела выканаць свае абавязанні перад турыстамі, людзі не здалелі паляцець на адпачынак у Чарнагорыю, Балгарыю. Праўда, у выпадку «Дром-тура» дырэктарка фірмы Наталля Ратынская абяцае грошы за нявыкананыя паслугі турыстам вярнуць. «Дром-тур» - фірма з вялікім досведам, таму гэтае здарэнне выглядае больш чым трывожным.

Мы звярнуліся па каментары да прафесіяналаў галіны, спрабуючы разабрацца, у чым прычына частых выпадкаў невыканання фірмамі сваіх абавязанняў перад кліентамі.

На думку Аляксандра Працукевіча («Аэратрэвел»), прычына вышэйапісаных скандалаў - у «дзіўнай» арганізацыі бізнэсу: «Грошы ў турыстаў бяруць у студзені, лютым, гэтыя грошы, груба кажучы, праядаюцца. У выніку, калі надыходзіць тэрмін выправы, тур выяўляецца неаплачаным, абавязанні нявыкананымі, а фірма трапляе ў фінансавую яміну».

Як кажа кіраўнік кампаніі «Аэратрэвел», напружанай сітуацыя ў «Дром-тура» была яшчэ ў мінулым сэзоне, фірма з цяжкасцю расплачвалася з аператарам за туры, засталася і невялікая запазычанасць. Ну, а ў гэтым сэзоне дайшло да публічных скандалаў, калі турысты прыязджалі ў аэрапорт, але іх не маглі пасадзіць у самалёт, які адлятаў у Балгарыю, бо фірма не аплаціла рэзэрвацыю. Гэта ўжо, безумоўна, выпадкі шчырага махлярства.

«Я думаю, што па сэзоне Міністэрства спорту і турызму што-небудзь зробіць, паспрабуе неяк абараніць рынак і кліентаў ад несумленных агентаў, - мяркуе Аляксандр Працукевіч. - Я, натуральна, супраць залішняй бюракратызацыі, але, напэўна, патрэбныя нейкія ахоўныя механізмы. Магчыма, варта падумаць пра поліс альбо ліцэнзаванне - бо такія выпадкі прычыняюць страты рэпутацыі галіны!»

А вось Аляксей Цярэнцьеў, дырэктар кампаніі «Лентяй», бачыць асноўную прычыну невыканання турыстычнымі агентамі сваіх абавязанняў у даванні неабгрунтаваных зніжак, на якія неабачліва «бяруцца» турысты. «З фірмамі, у якіх нармальнае ўтварэнне кошту, такіх выпадкаў не адбываецца. Нават калі яны часам зачыняюцца - то без скандалаў, без махлярства. Турысты павінны зразумець, што купляць туры занадта танна ці, як той казаў, «за рогам» - гэта пагражае непажаданымі наступствамі. Рэнтабельнасць у галіны і так занадта малая, мы ўстанаўляем кошт не адвольна, і ніхто з беларускіх турыстычных аператараў не стаў мільянерам. Але ёсць пэўная маржа, без якой немагчыма нармальна развівацца, даваць турыстам якасныя паслугі. Калі турысты бегаюць па фірмах у пошуках відавочна заніжанага кошту - то вінаваціць потым ім будзе няма каго. Прычым цікава, што кліенты раз за разам наступаюць на гэтыя граблі - гэта ўжо другі выпадак за лета. Трэба разумець – на балючае вока ўсё парушына ляціць. Перш чым аддаць свае грошы, адкрыйце сайт кампаніі, паглядзіце, у якім ён стане, пачытайце водгукі ў сеціве. Як гэта ні банальна, але дармовы сыр сапраўды толькі ў пастцы!».

Такім чынам, лета ў беларускай турыстычнай галіны сталася гарачым. Кліенты багацейшыя не сталі, і свае з цяжкасцю назапашаныя грошы на адпачынак яны часам нясуць у фірмы, якія сваёй дзейнасцю дыскрэдытуюць галіну. Гэта выклікае асаблівую трывогу ў прафесіяналаў - нікому не хочацца, каб у варунках і зыходу кліентаў ад пакетных тураў у турфірмаў з'явіўся дадатковы негатыўны вобраз.