СМІ: З Расеі паедуць больш за 700 амерыканскіх дыпламатаў і супрацоўнікаў амбасады

Амбасадар ЗША ў Маскве Джон Тэфт выказаў "глыбокае расчараванне" ў сувязі з прынятай МЗС РФ пастановай.

У рамках санкцый Расеі ў адказ на яшчэ не прынятыя амерыканскія санкцыі, пасольствы ЗША ў Маскве пакінуць больш за 700 супрацоўнікаў, сцвярджае "Коммерсант" са спасылкай на дыпламатычныя крыніцы.

Напярэдадні МЗС Расеі абвясціў, што адбірае ў амерыканскіх дыпламатаў лецішчы ў Срэбным Бары, а таксама скарачае колькасць персаналу ў амбасадзе ЗША да парытэтнага з расейскім персаналам. Вядома, што ў Вашынгтоне працуюць больш за 400 расейскіх супрацоўнікаў. Але афіцыйна колькасць амерыканцаў, якім давядзецца датэрмінова завяршыць камандзіроўку ў Маскве, не называлася.

Са слоў двух дыпламатычных крыніц у расейскай сталіцы, Дзярждэпу ЗША давядзецца скараціць колькасць супрацоўнікаў амбасады ў Маскве і генконсульстве на тэрыторыі Расеі больш чым на 700 чалавек. Колькасць будзе яшчэ больш значнай з улікам іх сямейнікаў, якія таксама паедуць на радзіму.

Амбасадар ЗША ў Маскве Джон Тэфт выказаў "глыбокае расчараванне" ў сувязі з прынятай МЗС пастановай.

Раней крыніца "Интерфакса" казала, што гаворка ідзе пра "сотні" якія пакідаюць Расею дыпламатычных і тэхнічных супрацоўнікаў амерыканскага замежнага прадстаўніцтва. Ён падкрэсліваў пры гэтым, што пакуль Масква не выдварае аналагічную колькасць амерыканцаў, а толькі прапаноўвае скараціць колькасць у адпаведнасці з колькасцю расейскіх дыпламатаў і супрацоўнікаў тэхнічнага персаналу, якія знаходзяцца ў ЗША, - да 455 чалавек.

Пастанова прыпыніць выкарыстанне ўсіх складскіх памяшканняў на Дарожнай вуліцы ў Маскве і лецішчаў у Срэбным Бары стала адказам на санкцыйныя меры, уведзеныя папярэдняй адміністрацыяй ЗША ў канцы 2016 года, на фоне прыняцця амерыканскім сенатам законапраекта пра новыя санкцыі супраць РФ. Праект чакае подпісу прэзідэнта Дональда Трампа.