Як беларусы «даядаюць крошкі» пасля расейцаў на будаўніцтве БелАЭС
11- 3.07.2017, 8:31
- 27,264
Узвядзенне небяспечнай станцыі ператварылася ў выгадную «лавачку» для расейскіх кампаній.
Галоўная будоўля ў сучаснай гісторыі Беларусі вядзецца расейскім падрадчыкам - група кампаній ASE - і на расейскі крэдыт. Меркавалася, што ў засваенні шматмільярдных рэсурсаў знойдзецца ўчастак работ для беларускіх субпадрадчыкаў, а таксама будуць максімальна выкарыстаны беларускія матэрыялы і абсталяванне.
Наколькі актыўна працуюць беларусы на будоўлю стагоддзя і ці ёсць «беларускае» ў БелАЭС, высветліла «Заўтра тваёй краіны», вывучыўшы архіў закупак, звязаных з пастаўкамі матэрыялаў і паслуг для патрэб БелАЭС.
Мы склалі топ-10 найбуйнейшых угод у першым паўгоддзі 2017-га.
Улічваліся завершаныя закупкі, інфармацыя паводле якіх была размешчана на сайце icetrade.by на 1 ліпеня 2017 г.
У дзясятку пераможцаў таргоў на пастаўку матэрыялаў, абсталявання і паслуг на збудаванне БелАЭС найбуйнейшымі па аб'ёмах пастаўшчыкамі прадказальна з'яўляюцца расейскія кампаніі.
Навошта Масква так настойліва фінансуе замежныя атамныя праекты ў страту самой сабе?
Але ў спісе прысутнічаюць і чатыры кампаніі, якія зарэгістраваныя ў Беларусі.
Гэта пастаўшчыкі сродкаў сувязі «Мобіджэт» і «Сэнсар-М» (на рынку з 1994 года). У дакументацыі «Сэнсар-М» паказваецца, што пастаўляць па кантракце абсталяванне сістэмы сувязі кампанія мае намер «з розных краін».
Яшчэ адзін беларускі рэзідэнт - кампанія «Белспецарматура», паводле звестак яе сайта, створана ў 2016 годзе спецыяльна для паставак на будаўніцтва АЭС. Гэтая кампанія прэзентуе Івана-Франкоўскі арматурны завод і яго засаўкі.
«Чыстае святло плюс» з'яўляецца найбуйнейшай клінінгавай кампаніяй Беларусі і даччыным падраздзяленнем расейскага холдынгу FACILICOM.