Кабякоў хоча прымусіць беларусаў купляць Geely

Кабякоў назваў беларуска-кітайскі гібрыд «вельмі годным».

Урад працуе над даручэннем распрацоўкі да канца года праграм падтрымкі куплі легкавых аўтамабіляў Geely, заявіў прэм'ер-міністр Беларусі Андрэй Кабякоў у інтэрв'ю праграме «Контуры» тэлеканала ОНТ, паведамляе tut.by.

Кабякоў падзяліўся сваімі ўражаннямі ад новага аўтамабіля, назваўшы яго «вельмі годным», хоць і прызнаўшы, што яму, напэўна, дастаўся «не найгоршы асобнік і ў добрай камплектацыі».

Прэм'ер-міністр нагадаў, што на першым этапе на заводзе плануецца вырабляць 60 тысяч аўтамабіляў за год з перспектывай павелічэння магутнасцяў да 120 тысяч. Пры гэтым да 90% продажу плануецца на экспарт. Масавы выраб плануецца пачаць ужо ў жніўні.

Нагадаем, беларуска-кітайскае СЗАТ «БелДжы», якое вырабляе легкавікі пад маркай Geely, створанае ў 2011 годзе. У лютым 2013 года на прадпрыемстве быў сабраны першы аўтамабіль.

Акцыянерамі «БелДжы» з'яўляюцца ААТ «БелАЗ» (51,49%), Zhejang Jirun Automobile Co., Ltd (33,47%), СЗАТ «Саюзаўтатэхналогіі» (9,01%) і CITIC International Investment Limited (6,03% ). У 2015 годзе паміж Барысавам і Жодзінам пачалося будаўніцтва новай пляцоўкі для вырабу аўтамабіляў.

Для рэалізацыі праекта выдадзены кітайскі крэдыт на 158,7 млн даляраў. Агульная сума інвестыцый складзе 400 млн еўраў.