Французы ацанілі першыя 100 дзён прэзідэнцтва Макрона
1- 13.08.2017, 20:10
- 17,921
Вынікі цяперашняга прэзідэнта Францыі горшыя, чым у ягонага папярэдніка Франсуа Аланда.
Большасць грамадзян Францыі незадаволеныя першымі 100 днямі прэзідэнцтва Эмануэля Макрона - пра гэта сведчаць вынікі апытання, праведзенага Ifop.
Аб сваёй незадаволенасці заявілі 64% рэспандэнтаў, пры гэтым 19% «вельмі незадаволеныя». Аднак у першыя дні пасля абрання Макрона падтрымлівалі 62%, паведамляе comments.ua са спасылкай на Figaro.
Адзначаецца, што вынікі Макрона горшыя, чым у ягонага папярэдніка на пасадзе кіраўніка дзяржавы - Франсуа Аланда, якога пасля 100 першых дзён ва ўладзе падтрымалі 46% французаў.
Прычым цяпер усяго 23% рэспандэнтаў чакаюць пераменаў «хутчэй у спрыяльным кірунку», адваротнага пункту гледжання прытрымліваюцца 39%, не бачаць ніякіх зменаў 38%. 45% французаў мяркуюць, што Макрон выконвае перадвыбарчыя абяцанні, з імі не згодныя 55%.
Інтэрнэт-апытанне праводзілася 7-9 жніўня. Апытаны 1001 чалавек, усе - старэйшыя за 18 гадоў. Хібнасць - 1,4-3,1 пункта.
У ліпені паведамлялася, што рэйтынг Макрона за месяц абрынуўся на 10%.