Шуневіч пачаў ствараць працоўныя лагеры для беларусаў
65- 15.08.2017, 15:21
- 65,963
Вызваленых з турмаў людзей будуць адпраўляць у спецыяльныя калгасы.
МУС Беларусі прапануе працаўладкоўваць былых асуджаных на сельскагаспадарчыя прадпрыемствы, паведамляе БелТА.
Мэта - «сацыяльная рэабілітацыя» былых асуджаных. Адпаведны законапраект знаходзіцца ў стадыі распрацоўкі, заявіў міністр унутраных спраў Ігар Шуневіч.
Міністр прапануе стварыць у структуры крымінальна-выканаўчай сістэмы МУС спецыялізаванае сельскагаспадарчае прадпрыемства.
«Такім чынам былыя асуджаныя атрымаюць магчымасць паспяховай рэсацыялізацыі. Па-першае, працаўладкаванне будзе садзейнічаць зніжэнню рэцыдыву, па-другое, дапаможа людзям уліцца ў грамадства, атрымліваць заробак, будаваць сем'і, гадаваць дзяцей, выплачваць зыскі», - сказаў Ігар Шуневіч.
У якасці эксперыментальнай базы ўжо выбрана КСУП «Хутар-Агра» пад Светлагорскам, рыхтуюцца дакументы для прававой пастановы. Калі праект будзе прызнаны паспяховым, яго распаўсюдзяць на ўсе вобласці.
Плануецца, што ўся вырабленая прадукцыя будзе выкарыстоўвацца для патрэбаў крымінальна-выканаўчай сістэмы МУС.
КСУП «Хутар-Агра» створаная ў ліпені 2016 года шляхам рэарганізацыі Светлагорскай аграпрамысловай управы ПА «Беларуснафта». Асноўным тыпам дзейнасці з'яўляецца вытворчасць малака, мяса буйной рагатай жывёлы, збожжа і кармоў. Колькасць работнікаў прадпрыемства складае больш за 200 чалавек.