У Тураве абраз пачаў выпускаць міра на вачах у людзей
44- 15.08.2017, 21:07
- 75,893
Гэтая падзея выклікала сапраўднае ўзрушэнне ў мясцовых прыхаджан і ў гасцей.
Надоечы выязное пасяджэнне прэзідыюма абласнога звязу жанчын у Жыткавіцкім раёне праходзіла згодна з праграмай. Аднак падчас наведвання капліцы на Барысаглебскіх могілках Турава здарылася неймавернае, піша gp.by.
Адная з сябраў дэлегацыі падышла да абраза Панны Марыі з немаўлём і згодна з традыцыяй прытулілася да яе ў малітве. Пасля паднесла да выявы набыты тут жа магніцік з выявай крыжа. Раптам на абліччы святой з'явілася буйная кропля, а па перыметры выявы - крыху меншыя. Абраз пачаў выпускаць міра на вачах людзей. Гэтая падзея выклікала сапраўднае ўзрушэнне ў мясцовых прыхаджан і ў гасцей.
Гісторыя гэтага абраза такая. Адной паджылай жыхарцы Турава ўвесь час сніўся сон, што ў яе былым доме ў вёсцы Ямпалі Рэчыцкага раёна ў каморы недзе пад бочкай ляжыць абраз. Бабуля вельмі прасіла, каб ёй прывезлі гэты абраз. Абраз сапраўды знайшлі ў каморы, але на ім не было відаць нічога, акрамя вачэй. Знаходку аддалі ў хрысцільны дамок Усясвяцкай царквы, дзе ён і захоўваўся некалькі гадоў. З 2001 года абраз знаходзіцца ў капліцы на Барысаглебскіх могілках. Самае цікавае ў тым, што ікона цудоўным чынам сама, без рэстаўрацыі, пачала пакрысе праяўляцца. Неўзабаве стала цалкам відно аблічча. Так стала ясна, што гэта копія Казанскай іконы Божай Маці.
Летась абраз некалькі разоў струменіў мірам. Сведкамі гэтай падзеі былі экскурсанты з Берасця і Менска, група дзяцей з ДЦП. Апошні раз цуд адбыўся 4 жніўня сёлета.
Вернікі думаюць, што гэта добры знак: так Бог умацоўвае нас у веры. Стараста праваслаўнай святыні ў гонар свяціцеляў Кірылы і Лаўрэнція Тураўскіх Валерый Катлярчук перакананы, што выпусканне міра з абраза - гэта сведчанне блізкасці Бога да нас, простых смяротных. Такім чынам Гасподзь адчыняе дзверы тым, хто моліцца, нібы кажучы: «Я побач».