Сяргей Далідовіч сабраў $7 тысяч на падрыхтоўку да Алімпіяды 2018

Гэта амаль палова сумы, неабходнай для падрыхтоўкі спартоўца.

За 10 дзён краўдфандынгавай кампаніі лыжнік Сяргей Далідовіч сабраў амаль палову сумы, неабходнай для падрыхтоўкі да Алімпіяды-2018, блізу 14 тысяч рублёў. Далідовіч, звольнены з Міністэрства спорту пасля 27 гадоў выступаў за нацыянальную каманду, распавядаў «Еўрарадыё», што збірае сродкі, каб даведацца, ці патрэбныя яго перамогі каму-небудзь, акрамя яго самога. Беларусы ўласным рублём даводзяць: патрэбныя! І робяць выступ на Алімпіядзе рэальным.

Палову ад сабраных сродкаў ахвяравалі спонсары, якія не пажадалі раскрываць сябе.

Куды пойдуць сабраныя сродкі?

«Пакуль я ў Беларусі, выдаткі мае простыя: бензін, каб даехаць да Раўбіч, - распавядае Сяргей Далідовіч. - А калі пачнецца падрыхтоўка да Алімпіяды, трэба будзе правесці адзін замежны высакагорны збор - блізу 2 тысяч еўраў, калі я паеду адзін. Плюс прыкладна два месяцы - 75 дзён па маіх падліках - прыйдзецца правесці ў Еўрапейскім звязе, каб, беручы ўдзел у спаборніцтвах FIS, здабыць алімпійскую ліцэнзію. Вось на гэта грошы і пойдуць. Спартовае харчаванне, экіпіроўка - на гэта ўсё я ўжо зарабіў сваім імем. За гэта плаціць не трэба».

У гэтыя дні ў Беларусі праходзіць чэмпіянат краіны ў лыжаролерных гонках. 17 жніўня Сяргей Далідовіч пабяжыць сваю «каронную» лыжную дыстанцыю - 15 км. Цікава, ці абгоніць 44-гадовага спартсмена хто-небудзь з тых, каго ў Федэрацыі лыжных гонак уважаюць больш годнымі паездкі на Алімпійскія гульні ў Пхенчан.