Беларуская нафтавая кампанія адказала на ультыматум Пуціна

Тарыфы на перавозкі нафтапрадуктаў у парты іншых краін ніжэйшыя за расейскія нават з улікам зніжкі.

Тарыфы на перавозкі нафтапрадуктаў у парты іншых краін ніжэйшыя за расейскія нават з улікам зніжкі, заявіў в.а. генеральнага дырэктара Беларускай нафтавай кампаніі Сяргей Грыб, каментуючы ў чацвер дзяржагенцтву магчымасці пераарыентацыі плыні беларускіх нафтапрадуктаў у кірунку партоў Паўночнага Захаду Расеі, паведамляе interfax.by.

«Так, сапраўды, кіраванне ААТ «РЧ» надало да канца 2018 года 50-адсоткавую зніжку на перавозку беларускага мазуту, дызельнага паліва і бензіну ў кірунку партовых станцый Кастрычніцкай чыгункі», - адзначыў С. Грыб.

«Мы на сталай аснове прапрацоўваем магчымасць пастаўкі беларускіх нафтапрадуктаў у кірунку расейскіх партоў. Аднак нават з улікам надання РЧ зніжкі, чыгуначныя тарыфы ў іншых кірунках ніжэйшыя ў параўнанні з расейскім кірункам», - сказаў прадстаўнік БНК.

З улікам розніцы ў кошце перавозкі нафтапрадуктаў праз расейскія і прыбалтыйскія тэрміналы агульныя транспартна-лагістычныя выдаткі ў расейскім накірунку значна павялічваюцца, падкрэсліў ён.

Таксама, прадоўжыў С. Грыб, падчас прапрацоўкі гэтага пытання БНК адзначыла цяжкасці ў асноўных расейскіх тэрміналаў пры прыёме беларускіх грузаў, асабліва ў зімовы перыяд. «Не заўсёды ўдавалася знайсці кампраміснае развязанне з аператарамі расейскіх тэрміналаў у гарантыі захавання якасці беларускіх нафтапрадуктаў пасля перавозкі», - адзначыў ён.

Нягледзячы на гэта, звярнуў увагу в.а. гендырэктара БНК, беларускія нафтапрадукты на сталай аснове прапануюцца да рэалізацыі праз парты Паўночна-Заходняга рэгіёну Расейскай Федэрацыі. «Аднак з улікам высокага кошту лагістычных выдаткаў нашы пакупнікі ў цяперашні момант аддаюць перавагу набываць нафтапрадукты праз парты краін Балтыі», - сказаў С. Грыб.

Пры гэтым ён падкрэсліў, што Беларуская нафтавая кампанія з'яўляецца асноўным экспарцёрам нафтапрадуктаў, якія вырабляюцца нафтаперапрацоўчымі заводамі Беларусі, і асноўная яе задача - дасягненне максімальнай эканамічнай эфектыўнасці ад рэалізацыі беларускіх нафтапрадуктаў на сусветных ранках.

Напярэдадні прэзідэнт РФ Уладзімір Пуцін прапанаваў прапісваць для беларускіх НПЗ строгае абавязацельства выкарыстоўваць расейскую інфраструктуру для перавозкі нафтапрадуктаў.

«Гэта трэба абмяркоўваць ў больш шырокім фармаце. Бо на беларускіх НПЗ перапрацоўваецца наша нафта, іншай там няма і наўрад ці з'явіцца, таму гэта трэба запакетаваць - атрыманне нашай нафты ад адпаведных пытанняў выкарыстання нашай інфраструктуры», - сказаў У. Пуцін на нарадзе аб развіцці транспартнай інфраструктуры Паўночнага Захаду РФ.

На нарадзе кіраўнік ААТ «РЧ» Алег Белазёраў далажыў Пуціну, што беларускія НПЗ адмаўляюцца ад паслуг расейскіх чыгунак на карысць прыбалтыйскай інфраструктуры, нягледзячы на зніжкі ў РФ, спасылаючыся на доўгатэрміновыя кантакты.

«У нафтаналівах мы далі 50% зніжку для перавозкі з беларускіх заводаў, але беларускія заводы пакуль не выкарыстоўваюць ні Усць-Лугу, ні Санкт-Пецярбург, а едуць у рэспублікі Прыбалтыкі. Мы вядзем дыскусію, яны кажуць, што ў іх доўгатэрміновыя кантракты на гэтую тэму ўкладзеныя, але мы стараемся выбудоўваць з імі дыялог», - сказаў А.Белазёраў.