Зааабаронцы паскардзіліся на берасцейскіх дэсантнікаў

«Ахова птушак Бацькаўшчыны» асудзіла дзеянні дэсантнікаў на выступах 2 жніўня.

Нагадаем, святочныя мерапрыемствы праходзілі ў 38-й асобнай гвардзейскай Венскай Чырванасцяжнай дэсантна-штурмавой брыгадзе. На вачах публікі байцы ляжалі на цвіках, дэсантаваліся з верталёта з невялікай вышыні і разбівалі галавой цэглу. А яшчэ раздзіралі жывых вужоў і жаб, піша b-g.by.

Прыродаахоўная грамадская арганізацыя «Ахова птушак Бацькаўшчыны» асудзіла такія дзеянні і накіравала звароты ў Міністэрства абароны Рэспублікі Беларусь і ў ГУУС г. Берасця. На думку арганізацыі, такія відовішчы былі недапушчальныя ні пры якіх абставінах.

«Калі нашы дэсантнікі ўважаюць сябе за годных праціўнікаў жаб і вужоў, то пры сустрэчы з больш моцнымі праціўнікамі наша войска пацерпіць паразу», - выказаўся ў гутарцы з карэспандэнтам «БГ» дырэктар «АПБ» Аляксандр Вінчэўскі.

На думку абаронцаў жывёл, дзеянні дэсантнікаў, учыненыя ў прысутнасці заведама малалетніх, трапляюць пад артыкул 339/1 «Жорсткае абыходжанне з жывёлай»:

Жорсткае абыходжанне з жывёлай, якое пацягнула яго гібель або калецтва, учыненае з хуліганскіх, карыслівых ці іншых нізінных падахвочванняў альбо ў прысутнасці заведама малалетняга, - караецца грамадскімі працамі, або штрафам, або папраўчымі работамі на тэрмін да аднаго года, або арыштам.

Тое ж дзеянне, учыненае паўторна або групай асоб, - караецца арыштам, ці абмежаваннем волі на тэрмін да аднаго года, або пазбаўленнем волі на той жа тэрмін.

«Адабранне дзікіх жывёл з прыроды рэгулюецца законамі Рэспублікі Беларусь і пастановамі Савета міністраў Рэспублікі Беларусь. Канфіскацыя вужоў і жаб з іх асяроддзя пражывання дазволеная выключна для выкарыстання ў навуковых, выхаваўчых і адукацыйных, а таксама рэкрэацыйных, эстэтычных і іншых мэтах у працэсе ажыццяўлення культурнай дзейнасці. У гэтым выпадку канфіскацыя была ажыццёўленая незаконна, - гаворыцца ў звароце, накіраваным у Міністэрства абароны. - Такія выступленні падрываюць аўтарытэт войска і настройваюць грамадзян Беларусі ў дачыненні да яго негатыўна. Просім ужыць захады для недапушчэння ў будучыні такіх выпадкаў дыскрэдытацыі Узброеных Сіл Рэспублікі Беларусь і парушэнні заканадаўства ў ахове і абароне жывёл Рэспублікі Беларусь вайскоўцамі».