Падстрэленага міліцыяй на Новы год менчука асудзілі на пяць гадоў «хіміі»

29-гадовы Андрэй Гаўрош не прызнаў сваёй віны і заявіў, што супрацоўнік міліцыі першым напаў на яго.

У міліцыянта іншая версія - Гаўрош зладзіў бойку, спрабаваў выхапіць табельную зброю, таму ён стрэліў тры разы. Выслухаўшы бакі, суд Маскоўскага раёна вынес абвінаваўчы прысуд у дачыненні да менчука - 5 гадоў абмежавання волі без накіравання ў выпраўленчую ўстанову, піша tut.by.

Напярэдадні дзяржабвінаваўца Алена Крупеніна запрасіла для менчука Андрэя Гаўроша 3 гады пазбаўлення волі ў калоніі агульнага рэжыму. А вось сам пацярпелы супрацоўнік міліцыі Руслан Салаўёў папрасіў абвінавачанага строга не караць і не пазбаўляць волі. Судовае пасяджэнне па стральбе ў навагоднюю ноч на праспекце Любімава ў Менску доўжылася тры дні. Першым быў дапытаны пацярпелы сяржант Руслан Салаўёў. Міліцыянт не змог дакладна адказаць на пытанне, як і куды ён стрэліў тры разы.

- папераджальнага не было, - распавядаў пацярпелы. - Першы раз стрэліў у нагу, каб нанесці меншую шкоду абвінавачанаму.

Як яшчэ адна куля трапіла ў спіну Гаўрошу, а трэцяя - у ліфт, міліцыянт не распавёў.

У сваім допыце абвінавачваны ўказаў: калі Салаўёў прыйшоў на выклік, пачалася слоўная сварка, пасля чаго сяржант ударыў Андрэя Гаўроша, той пахіснуўся, палез за тэлефонам і ў гэты момант раздаўся стрэл. Далей мянчук нічога не памятае. Выразнага адказу, як страляў міліцыянт, не дала і экспертыза, а сам экспэрт не быў дапытаны ў зале суда. З матэрыялаў крымінальнай справы стала вядома, спецыялісты ўсумніліся ў аповедзе Руслана Салаўёва, што куля ў спіну была выпушчана ў ходзе барацьбы. Па заключэнні экспэртаў, ствол знаходзіўся на адлегласці 3-5 см.

«Абставіны прычынення гэтага агнястрэльнага ранення не адпавядаюць абставінам, выкладзеным Салаўёвым», - пазначана ў дакументах.

Нагадаем, надзвычайнае здарэнне адбылося ў навагоднюю ноч на праспекце Любімава. Пасля 6-й раніцы суседзі Андрэя Гаўроша выклікалі міліцыю, каб супакоіць шумную кампанію. На лесвічнай пляцоўцы былі толькі сяржант Руслан Салаўёў і гаспадар кватэры Андрэй Гаўрош, праз хвіліну пачуліся стрэлы. Пацярпелы міліцыянт лячыўся ў вайсковым шпіталі 10 дзён, абвінавачаны - 17. Следчы камітэт пачаў крымінальную справу па ч. 2 арт. 363 КК «Супраціў супрацоўніку органаў унутраных спраў». Санкцыя артыкула - да 5 гадоў пазбаўлення волі.

Падчас суда таксама ўздымалася пытанне: ці мог міліцыянт ісці на выклік адзін ці не. Адны калегі Салаўёва сцвярджалі, што мог, іншыя - не. Сам сяржант распавёў: напярэдадні супрацоўнікаў міліцыі папярэдзілі, каб па адным на званок не выбывалі, у тую раніцу дзяжурны разам з Салаўёвым паслаў яшчэ аднаго вартавога парадку. Але сяржант вырашыў не чакаць напарніка:

- Думаў, па-хуткаму ўсё зраблю і вярнуся.

У ходзе судовага разбору высветлілася: у тую раніцу ў сяржанта была табельная зброя, кайданкі і ліхтарык. Газавы балончык скончыўся напярэдадні і міліцыянт не паспеў купіць новы, а гумовая палка адна на ўсё аддзяленне, таму Салаўёў не змог яе ўзяць.

Прысуд не ўвайшоў у законнае дзеянне і можа быць абскарджаны.