Маладзечанскі дырэктарат атрымаў вялікія тэрміны

Суд вынес прысуд паводле крымінальнай справы ў дачыненні да гендырэктара Маладзечанскага завода металаканструкцый і ягонага намесніка.

Генеральны дырэктар ААТ «Маладзечанскі завод металаканструкцый» асуджаны на 8 гадоў пазбаўлення волі з адбываннем пакарання ў калоніі ўзмоцненага рэжыму. Ягоная намесніца ў эканоміцы і фінансах прысуджаная да 6 гадоў пазбаўлення волі з адбываннем пакарання ў калоніі агульнага рэжыму, піша tut.by.

У абодвух канфіскуюць маёмасць і пазбавяць права займаць пасады, звязаныя з выкананнем арганізацыйна-распарадчых абавязкаў, на тэрмін 5 гадоў.

З абвінавачаных будзе спагнаная ў салідарным парадку на карысць ААТ «Будмаш» у кошт кампенсацыі шкода, прычыненая злачынствам, сумай 51 368 рублёў 14 капеек.

Нагадаем, злачынствы былі ўчыненыя яшчэ ў 2015 годзе, у той час калі фігуранты працавалі на ААТ «Будмаш» у Менску, але вядома стала пра іх толькі тады, калі яны ўжо займалі пасады на Маладзечанскім заводзе металаканструкцый.

Як вынікае з абвінавачвання, галоўны бухгалтар прадпрыемства цягам практычна года ўносіла ў афіцыйныя дакументы загадзя ілжывыя звесткі, тым самым скажаючы звесткі дзяржаўнай статыстычнай справаздачнасці.

Пасля падпісання дакументы з улікам папярэдняй дамоўленасці з генеральным дырэктарам накіроўваліся ў Міністэрства архітэктуры і будаўніцтва, а таксама ў галоўную статыстычную ўправу Менска. Злачынныя дзеянні ўчыняліся, зыходзячы з карыслівай і іншай асабістай зацікаўленасці - гаворка ідзе аб атрыманні прэмій і ўзнагароды пры адсутнасці на тое падстаў.

Генеральны дырэктар, у сваю чаргу, пры працаўладкаванні быў пастаўлены ў вядомасць, што пры наяўнасці запазычанасці ў аплатах у бюджэт, росту стратаў ад рэалізацыі прадукцыі, тавараў, паслуг, запазычанасці ў выплаце заробку, прэміі і ўзнагароды не налічваюцца і не выплачваюцца. Гэта тычыцца як кіраўніка прадпрыемства, так і кіраўнікоў структурных падраздзяленняў і галоўных спецыялістаў. Ведаючы пра тое, што на прадпрыемстве ў 2015 годзе былі праблемы, генеральны дырэктар утойваў адпаведныя факты. З мэтай завалодвання грашовымі сродкамі прадпрыемства па ўзгадненні з ім у Міністэрства архітэктуры і будаўніцтва падаваліся дакументы, якія змяшчаюць загадзя ілжывыя звесткі аб выніках гаспадарчай дзейнасці таварыства.

Нягледзячы на тое, што падставы для налічэння выплат і прэмій названай катэгорыі работнікаў, у тым ліку галоўнаму бухгалтару, адсутнічалі, налічэнні ўсё ж рабіліся. Выплачваліся прэміі і самому генеральнаму дырэктару.