Жыхары «Розачкі»: Нейкаму мільярдэру спатрэбіўся цэнтр горада, а нас – у Шабаны?

У вядомым раёне Менска прадаўжаецца бунт жыхароў супраць адміністрацыі і забудоўнікаў.

17 жніўня сотні менчукоў прыйшлі ў адміністрацыю Маскоўскага раёна, каб абмеркаваць лёс знакамітай «Розачкі і Карлачкі». Два месяцы таму ўлады ўжо прэзентавалі праект дэталёвага плана ў межах вуліцы Розы Люксембург – пр. Жукава – вул. Харкаўскай – паласы адводу чыгункі. Праз незадаволенасць і звароты жыхароў мінулым разам абмеркаванне прызналі несапраўдным, піша kp.by.

Гэтым разам абмеркаванне атрымалася яшчэ больш ажыўленым: у актавай зале яблыку не было дзе было ўпасці. Каб паслухаць пра будучыя пераўтварэнні раёна на сустрэчу з уладамі прыйшло блізу 400 чалавек.

Згодна з праектам, у раёне знясуць 13 прыватных дамоў і 1587 кватэраў агульнай плошчай 61,2 тыс. кв. м, а на іх месцы ўзвядуць вышынныя дамы, паркінг, школы, дзіцячыя сады, адміністрацыйныя комплексы.

– Праектаваная тэрыторыя была забудаваная ў 1950 – 1960-я гады, калі ў краіне існавала вострая неабходнасць у забеспячэнні жыллём людзей, – распавядае галоўная архітэктарка праекту Ірына Абуховіч. – На сёння значная частка гэтай забудовы маральна і фізічна састарэла, а тэрыторыі маюць патрэбу ў комплекснай рэканструкцыі. Праект не новы, пастановы пра знос і рэканструкцыю прымаліся ў трох паслядоўных генпланах сталіцы.

Рэканструяваць тэрыторыю плануюць за два этапы: да 2023 і да 2030 года.

– У першую чаргу зносіць будуць 2 – 3-павярховыя дамы ў межах вуліцаў Розы Люксембург – Карпава – Лібкнехта – Каржа, – тлумачыць архітэктарка. – Там з'явяцца новыя жылыя кварталы з дамамі і аб'ектамі сацыяльнай інфраструктуры. Пяціпавярховыя дамы будуць захаваныя. Да 2030 года кватэрны фонд раёна павялічыцца на 3633 адзінкі.

Абяцаюць, што да 2030 года «Розачка» папоўніцца дзіцячымі садамі, дзвюма школамі і паліклінікай па вуліцы Хмялеўскага. Акрамя гэтага на скрыжаванні вуліцаў Волаха і Карпава з'явіцца грамадска-жылы комплекс, а на Купрыянава – ФАК.

– Падобна на тое, задача Менгарвыканкама – вызваліць больш месца для забудоўнікаў, якім патрэбны цэнтр горада! – кажа жыхар дома №55 на вуліцы Лібкнехта. – Будаўніцтва дамоў тут будзе з парушэннямі горадабудаўнічых, супрацьпажарных і санітарных нормаў!

Многіх жыхароў цікавіла, як ім будзе кампенсавацца знос дамоў.

– Гэта авантура і трызненне, – здзіўляецца іншая жыхарка. – У горадзе так шмат зносяць, але нічога не будуюць. А цяпер нейкаму мільярдэру спатрэбіліся нашы дамы ў цэнтры горада! Я пражыла тут 60 гадоў. Чаму сёння малапавярхоўка мяркуецца недахопам? У які раён нас пераводзіць будуць? Мы, старыя, не можам ехаць у Каменную Горку і Шабаны. Я адсюль не паеду!

– Адабранне зямельных надзелаў у грамадзянаў ажыццяўляецца ўказам прэзідэнта №58 пра абарону маёмасных правоў пры канфіскацыі зямельных надзелаў для дзяржаўных патрэбаў. Вы не атрымаеце менш, чым у вас ёсць, – тлумачыць намеснік кіраўніка адміністрацыі Маскоўскага раёна Уладзімір Танкевіч. – На кожнага прапісанага вылучаецца 15 квадратных метраў. Калі ў аднапакаёвай кватэры прапісаныя 10 чалавек, то вы атрымаеце ўласнасць не менш за 150 квадратных метраў.

– Дык а ў якім месцы дадуць? У Каменнай Горцы ці Шабанах? – цікавяцца з залы.

– У межах горада Менска, – адказвае чыноўнік. – У нас зносілі 48 дамоў у раёне Алібегава – Брыля. Толькі тры справы ў судзе, астатнія ўсе задаволеныя. У Шабаны перасялілі толькі аднаго – і то ён сам пагадзіўся, таму што прапанаваная плошча была большай за тую, што ён меў. Пакуль што гэта горадабудаўнічыя планы, яны залежаць ад сацыяльна-эканамічнага стану краіны, не магу сказаць, калі вас выселяць.

Аднак былі на сходзе і тыя жыхары, якія не супраць зносу дамоў.

– Вы сваім жыллём задаволеныя ўсе? – звяртаецца Ала да суседзяў у раёне. – Я жыву ў доме №142 на вуліцы Розы Люксембург, 1958 года пабудовы, і мы з суседзямі за пераезд, таму што ў нас трубы гнілыя. Лепш жа атрымаць новае жыллё.

– Абмеркаванне толькі пачалося, – кажа Уладзімір Танкевіч. – Яно прадоўжыцца да 8 верасня. Потым горадабудаўнічая камісія прыме ўсе заўвагі і прапановы. Заканадаўча абгрунтаваныя паступяць у праектны інстытут камісіі, і мы будзем глядзець: адпраўляць праект на дапрацоўку або прымаць яго. Потым правядуць усе экспертызы, а потым ужо горад будзе прымаць пастановы. Усе гэтыя працэдуры доўжацца прыкладна год-паўтара.

Мянчанка Алена жыве ў двухпавярховым доме на вуліцы Розы Люксембург ужо больш за 30 гадоў. Паводле плану, ён таксама ідзе пад знос.

– У гэтым доме раней жыла мая бабуля, і калі яго будавалі мае бацькі на суботніках – для мяне ён з гісторыяй, – распавядае яна. – Ціхія раёны ў цэнтры добрыя тым, што яны малапавярховыя і не густазаселеныя, ёсць паветра і прастора. Тут жывуць людзі, якія яшчэ вясной набывалі кватэры, і ніхто ім тады не сказаў, што іхнім дамам пагражае знос. Я зразумела на абмеркаванні, што «Розачка» будзе шматпавярховай, хутчэй за ўсё, дамы будуць пад 14 паверхаў. Вы разумееце, што тут будзе? Гэта цалкам зменіць раён, не ў лепшы бок: будуць стаяць слупкі, а вакол – машыны, бо парковачныя месцы цяпер практычна не набываюць. Ды і я размаўляла з архітэктарамі, пабудаваць тут тую колькасць парковак, якая запланаваная, амаль немагчыма. Таму будзем далей змагацца, збіраць подпісы.

Жыхары кварталаў «Розачкі» ўжо арганізавалі ініцыятыўную групу, і на сходзе прадоўжылі збіраць подпісы супраць зносу дамоў.

– Цягам 50 гадоў дамы не мелі капітальнага рамонту, хоць людзі штомесяц на яго здавалі грошы, – кажа арганізатар ініцыятыўнай групы Зміцер. – А цяпер жыхары знаходзяцца ў такой сітуацыі, што іхнія дамы прызнаюць трухлявымі і людзей высяляюць у арэнднае жыллё. Фактычна горад, а не жыхары вінаваты ў тым, што дамы сталі такімі. А заканадаўства на баку ўлады. Мы вельмі хацелі б зрабіць экспертызу праекта, але на гэта патрэбныя вялікія грошы. Цяпер мы будзем збіраць далей подпісы і вылучаць людзей у горадабудаўнічую камісію!