Шуневіч загадаў хакеістам менскага «Дынама» выйсці ў плэй-оф КХЛ

Першы матч новага сезона ў КХЛ менскае «Дынама» правядзе ўжо заўтра.

Выхад у плэй-оф КХЛ для хакеістаў менскага «Дынама» з'яўляецца цалкам дасягальнай задачай. Пра гэта заявіў старшыня назіральнага савета клуба Ігар Шуневіч, паведамляе БелТА.

Ігар Шуневіч нагадаў, як склаўся мінулы сезон для дынамаўцаў.

«Нашы чаканні, чаканні заўзятараў у нейкай ступені былі апраўданыя, але ў чымсьці былі расчараванні. Мая ацэнка - цвёрдая чацвёрка па пяцібальнай сістэме. Галоўны негатыў, вядома, выступ каманды ў плэй-оф. Але гэта ўжо гісторыя, з якой можна было зрабіць правільныя высновы. І перш за ўсё выснову такую: пакідала жадаць лепшага стабільнасць гульні каманды. Як рэаліст думаю, мэта перад камандай у сезоне, які стартуе заўтра - выхад у плэй-оф - цалкам дасягальная. Таксама мы ставім перад гульцамі задачу годна выступіць у плэй-оф. Пад годным выступам разумею відовішчны, прыгожы хакей, які б усім прыносіў задавальненне: вам - ад гульні, а нам, заўзятарам, ад яе прагляду. Трэба змагацца да канца, улічваючы найвышэйшую канкурэнцыю, якая сёння існуе ў КХЛ», - адзначыў старшыня назіральнага савета.

Першы матч новага сезона ў КХЛ менскае «Дынама» правядзе 23 жніўня на лёдзе «Менск-Арэны» з фінскім «Ёкерытам». Пачатак матчу а 19.30.