Мінюст Украіны: Дыпламаты РФ ад раскідання СССР працавалі над нападам на іншыя краіны

Расея парушыла чатыры канвенцыі падчас агрэсіі ў дачыненні да Украіны.

Праведзеныя ў рамках пазоваў Украіны да Расеі аналіз Міністэрства замежных спраў (МЗС) і Міністэрства юстыцыі паказаў, што ў РФ даўно рыхтаваліся да агрэсіі. Пра гэта ў інтэрв'ю "Обозревателю" сказаў міністр юстыцыі Павел Пятрэнка.

"Мы з МЗС у 2014 годзе правялі велізарную працу. З майго глыбокага пераканання, расейскія спецслужбы і расейская дыпламатыя з моманту раскідання Савецкага Саюза працавалі з выразнай мэтай - стварыць магчымасці для нападу на іншыя краіны", - заявіў ён.

Міністр адзначыў, што ва ўсіх міжнародных дамовах, акрамя чатырох, да якіх далучылася РФ, быў тэзіс, які дазваляў Маскве ўхіляцца ад міжнароднай юрысдыкцыі.

"Напрыклад, Канвенцыя аб забароне распаўсюду зброі масавай паразы. Расея ўставіла агаворку: у выпадку спрэчак паміж старанамі гэтай канвенцыі аб яе выкананні РФ пакідае за сабой права адмовіцца ад юрысдыкцыі арбітражу. Гэта азначае, што Масква можа парушыць гэтую канвенцыю колькі хоча разоў, але без яе згоды Міжнародны суд не можа гэтую справу разглядаць", - сказаў Пятрэнка.

На ягоную думку, расейскія дыпламатыя і спецслужбы рыхтаваліся да агрэсіўных дзеянняў не толькі на тэрыторыі Еўропы.

Пятрэнка назваў чатыры канвенцыі, якія парушыла РФ падчас агрэсіі ў дачыненні да Украіны.

"Гэта Канвенцыя аб абароне правоў чалавека, Канвенцыя аб забароне расавай дыскрымінацыі, Канвенцыя аб забароне фінансавання тэрарызму і Канвенцыя марскога права, бо Расея выкарыстоўвае ўкраінскія прыродныя рэсурсы ў нашых тэрытарыяльных водах", - адзначыў ён.

Нагадаем, з 6-га да 9 сакавіка ў Гаазе прайшлі папярэднія слуханні аб пазове Украіны супраць Расеі, у якім указваецца на парушэнне Масквой пунктаў Канвенцыі ААН аб барацьбе з фінансаваннем тэрарызму і Канвенцыі аб ліквідацыі ўсіх формаў расавай дыскрымінацыі.

Кіеў патрабаваў асудзіць акты тэрарызму ў Харкаве і на Данбасе, уключаючы збіты рэйс MH17, а таксама абавязаць Расею выплаціць кампенсацыі, сума якіх у пазове не пазначаная. Акрамя гэтага, суду прапануецца прыцягнуць да адказнасці афіцыйных асоб, вінаватых, на думку пазоўнікаў, у падтрымцы тэрарызму. Другі блок прэтэнзій тычыўся парушэнняў правоў крымскіх татараў і ўкраінцаў з боку акупацыйнай улады Крыма.

Украіна прасіла Міжнародны суд ААН на час разгляду справы, у якасці меры забеспячэння пазову, забараніць РФ рабіць усялякія крокі, якія пагаршаюць сітуацыю.

19 красавіка Міжнародны суд ААН адмовіў Украіне ў часовых захадах супраць Расеі аб Канвенцыі барацьбы з фінансаваннем тэрарызму. Пры гэтым суд у Гаазе пагадзіўся ўвесці захады паводле пазову Украіны супраць Расеі для абароны нацыянальных меншасцяў у акупаваным Крыме.

Наступнае паседжанне паводле справы "Украіна супраць Расеі" прызначанае на 12 чэрвеня 2018 года.