Начальнік МРЭА ДАІ Пінска пойдзе пад суд за злоўжыванне ўладай

Акрамя гэтага, высокапастаўленага супрацоўніка ДАІ вінавацяць у хабарніцтве.

СК скончыў расследаванне крымінальнай справы ў дачыненні да 52-гадовага былога кіраўніка МРЭА ДАІ горада Пінска паводле арт.2 арт.424 (Злоўжыванне ўладай) і ч.2 арт.430 (Атрыманне хабару паўторна) КК Рэспублікі Беларусь, паведамляе tut.by.

Мужчына абвінавачваецца ў тым, што, займаючы гэтую пасаду, у перыяд з 2014 да 2016 года атрымліваў грашовую ўзнагароду за станоўчы вынік пры здачы кваліфікацыйных экзаменаў. У рамках следства ўстаноўленыя 4 факту прыняцця сум да 250 даляраў ЗША. Акрамя таго, яму выстаўленыя 11 эпізодаў садзейнічання пры тэставанні на кампутары з карыслівай і іншай зацікаўленасці.

Таксама фігурантамі гэтай схемы выступалі і двое былых таварышаў па службе абвінавачанага. Так, 57-гадовы жыхар Пінскага раёна і 65-гадовы жыхар Пінска, паводле звестак следства, падбухторвалі да давання хабару 25 грамадзян, якія жадаюць атрымаць пасведчанне кіроўцы пры фармальным праходжанні экзаменаў. Затым яны перадавалі частку ад набытых такім чынам сродкаў службовай асобе МРЭА. Ім інкрымінаванае ўчыненне злачынстваў, прадугледжаных арт.431 (Даванне хабару) КК Рэспублікі Беларусь.

Супрацьпраўная дзейнасць была выяўленая ўправай уласнай бяспекі МУС Берасцейскай вобласці. Першапачаткова выклікаў падазрэнне факт паспяховай здачы мужчынам экзаменаў у Пінску, пасля 8 няўдалых спробаў у Берасці. У сувязі з гэтым пачалося разбіральніцтва, падчас якога былы начальнік сваю датычнасць да гэтых злачынстваў не прызнаў.

Следчыя ў дачыненні да экс-кіраўніка падраздзялення і ягонага 57-гадовага знаёмага ўжылі меру стрымання ў выглядзе ўзяцця пад варту. 65-гадовы пенсіянер знаходзіцца пад падпіскай аб нявыездзе. На маёмасць абвінавачаных накладзены арышт.

Матэрыялы крымінальнай справы вывучаныя пракурорам і накіраваныя ў суд для разгляду.