Вядомы настаўнік: Пераход на аплату харчавання праз АРІП - жах для класных кіраўнікоў

Настаўнік не будзе атрымліваць грошы за гэтую працу, а вось па галаве атрымліваць за розныя хібы будзе.

Напярэдадні новага навучальнага года стала вядома, што плата за харчаванне ў школе будзе праводзіцца выключна праз АРІП, сваімі разважаннямі наконт таго, як гэта адаб'ецца на класных кіраўніках у «Фэйсбуку» дзеліцца вядомы настаўнік Яўген Лівянт:

- Распавядаю пра аплату харчавання ў школах праз АРІП.

«Рэч нават не ў залішняй нагрузцы для настаўніка. Рэч у прыніжэнні самога настаўніка, якому даводзіцца рабіць непатрэбныя рэчы. Калі б гэта трэба было, іншае пытанне. Але чалавеку рабіць непатрэбную працу - гэта прыніжэнне, гэта жудасная нагрузка, гэта тое, чаго мы дапусціць ні ў якім разе не можам...» - з выступу Лукашэнкі на «рэспубліканскай педагагічнай нарадзе».

Кожны дзень класная кіраўніца павінны будзе да 16:00, гэта значыць падчас урокаў, увайсці ў сістэму са свайго рахунку, натуральна, скарыстаўшыся асабістым ПК і аплачаным за свой кошт інтэрнэтам.

Увайшоўшы ў сістэму пад асабістым id, настаўніца павінна будзе паставіць птушачкі насупраць прысутных у школе вучняў і адзначыць адсутных (а яшчэ ёсць тыя рэдкія вучні, якія ў школу ходзяць, але ў школьнай сталовай не ядуць). Затым яна павінна будзе адзначыць, які нумар комплексу, якое дзіця з'ела на сняданак. А калі хто-небудзь з дзяцей яшчэ і абедае ў школе, то настаўніца абавязаная адзначыць меню для кожнага: бульбачка, катлета і г.д. А яшчэ будуць дзеці, якія з нейкіх прычын (напрыклад, праз хваробу) сыдуць пасля некалькіх урокаў дахаты, і іх трэба будзе пераадзначаць.

Раз на тыдзень класнай кіраўніцы будуць дасылаць звесткі аб неплацельшчыках, з якімі ёй давядзецца правесці працу.

Так, забыўся сказаць, што сістэма гэта ўвесь час завісае, таму настаўніку будзе не да ўрокаў. Наогул, не вельмі зразумела, ці разлічаная сістэма на адначасовы ўвод такой колькасці інфармацыі. Гэта хто-небудзь тэставаў? Думаю, што не.

Дарэчы, калі ў класнага кіраўніка няма асабістага ПК або смартфона з аплачаным інтэрнэтам, то ўводзіць звесткі ён будзе з іншымі настаўнікамі па чарзе з тых лічаных кампутараў у школе, якія падлучаныя да інтэрнэту.

Так, яшчэ забыўся сказаць, што не ўсе настаўнікі сябруюць з АРІП (а некаторыя і наогул з кампутарам), таму ім давядзецца цяжка, а імавернасць памылак будзе вельмі вялікай.

Пры гэтым настаўнік не будзе атрымліваць грошы за гэтую працу, а вось па галаве атрымліваць за розныя хібы будзе. А памылкі будуць непазбежна: штодня уносіць звесткі пра30 вучняў - гэта праца матэрыяльна адказнага бухгалтара, а не настаўніка, які гэтай працы ненавучаны. Значыць, з настаўніка яшчэ і грошы запатрабуюць, калі нешта пойдзе не так.

І дарэчы, хто будзе ўсім гэтым займацца, калі класнага кіраўніка ў гэты дзень няма ў школе, напрыклад, праз хваробу?