«Захад-2017»: Пад Віцебскам пачаліся ракетныя стрэльбы

На палігоне Лосвіда ўведзены «асаблівы рэжым».

Вадзім Шадура, камандзір 103 асобнай гвардзейскай паветрана-дэсантнай брыгады, звярнуўся да жыхароў Віцебскай вобласці праз газету «Віцьбічы»:

- У 13 кіламетрах ад Віцебска ў кірунку Гарадка размешчаны палігон «Лосвіда», які належыць да вайсковай часткі 52287. Ён размешчаны ў непасрэднай блізкасці і мяжуе з піянерскім лагерам «Ліпкі» РУП ДСК, а таксама вёскай Машкіна. Найбліжэйшыя да палігона населеныя пункты, размешчаныя ў радыусе 5 кіламетраў, - Вялікае Лосвіда, Саўчанкі, Бліны, Заронава, Палойнікі, Іванава.

На тэрыторыі палігона штодня праходзяць баявыя стрэльбы, запуск ракет, падрыўныя работы, кіраванне баявымі машынамі і іншыя небяспечныя для жыцця і здароўя чалавека мерапрыемствы баявой падрыхтоўкі войскаў. У выніку правядзення стрэльбаў, а таксама вучэнняў у месцах іх правядзення могуць заставацца не разарваныя боепрыпасы, якія, знаходзячыся ў зямлі ці ў густой травяной расліннасці, не бачныя, якія ўяўляюць смяротную небяспеку.

У мэтах выканання патрабаванняў бяспекі тэрыторыя палігона па перыметры пазначаная паказальнікамі, забараняючымі праезд, праход на тэрыторыю палігона, а таксама кіроўным складам палігона штомесяц праводзіцца інфармаванне і прафілактыка няшчасных выпадкаў шляхам аб'езду мясцовых сельскіх саветаў, арганізацый, школ, размешчаных паблізу палігона, дзе з мясцовым насельніцтвам праводзяць гутаркі, развешваюць яркія інфармацыйныя ўлёткі. Акрамя гэтага ў дні правядзення баявых стрэльбаў праезд, а таксама праход грамадзян на тэрыторыю палігона абмежаваны ачапленнем палігона.

На жаль, не гледзячы на ўсе ўжытыя захады, не ўсе жыхары навакольных вёсак і грамадзяне, якія прыязджаюць з іншых населеных пунктаў, усведамляюць небяспеку знаходжання на забароненай тэрыторыі, грэбуюць бяспекай свайго жыцця і жыцця сваіх дзяцей. Пры гэтым людзі пераследуюць розныя мэты: многія ідуць з мэтай збору грыбоў і ягад, хтосьці - прагулак і пікнікоў, а хтосьці для збору металічнага лому або нарыхтоўкі дроў.

Паважаныя грамадзяне! Не рызыкуйце сабой і сваімі дзяцьмі! Абыдзеце палігон бокам! Не падбірайце, тым больш не разбірайце разарваныя боепрыпасы і іншыя незнаёмыя прадметы. Гэта смяротна небяспечна для вашага жыцця і здароўя!

Нагадаем, расейска-беларускія вучэнні «Захад-2017» на тэрыторыі Беларусі пачнуцца ў верасні. Для перакідання расейскага кантынгенту задзейнічаная рэкордная колькасць чыгуначных вагонаў - больш за 4-ы тысячы. Многія палітыкі і вайсковыя экспэрты мяркуюць, што расейскія войскі пасля вучэнняў застануцца ў Беларусі.

У вучэннях будзе задзейнічаны шэраг вайсковых палігонаў на тэрыторыі Беларусі: пад Лепелем, Барысавам, Віцебскам, Асіповічамі, Ружанамі і Даманавым. Таксама паведамляецца, што запланаваныя рэйды на «адрэзку мясцовасці» каля Дрэтуні.

8 верасня на Кастрычніцкай плошчы ў Менску прайшла Акцыя папярэджання з патрабаваннем скасавання вучэнняў «Захад-2017».