Таксіст ў Магілёве зняў з карткі пасажыра $5 тысяч

Таксіст на працягу чатырох дзён аб'язджаў банкаматы, пакуль не спустошыў карту цалкам.

Таксіст ў Магілёве скраў амаль 5 тысяч даляраў з карткі пасажыра, які п'яным наважыў паехаць з Магілёва ў Горадню.

У 61-гадовага жыхара аднаго з раёнаў Магілёўшчыны з банкаўскай карты знікла прыстойная сума грошай. Пацярпелы працаваў у Расейскай Федэрацыі вахтавым метадам, нядрэнна зарабляў. У адпачынку прыязджаў у Магілёў да знаёмай, затым вырашыў адправіцца ў Горадню. Да вакзала паехаў на таксі, піша mogilevnews.by.

- У касе ён купіў білет, зняўшы перад гэтым грошы ў банкамаце. Таксіст стаяў побач і назіраў. З білетам пасажыр накіраваўся да вагона, але на цягнік па прычыне моцнага алкагольнага ап'янення яго не пусцілі. Таксіст пагадзіўся адвезці яго ў Горадню за 500 беларускіх рублёў, - распавядае старшы оперупаўнаважаны ў асабліва важных справах аддзела па раскрыцці злачынстваў у сферы высокіх тэхналогій УУС аблвыканкама Андрэй Нікіцін.

У банкамаце мужчына зняў абумоўленую суму (зноў пад пільным поглядам таксіста), аддаў кіроўцу і сеў у машыну. Па шляху выпіў бутэльку гарэлкі. На наступны дзень, прачнуўшыся пасля абеду, выявіў, што згубіў карту. Ён патэлефанаваў у Расею, у банк, і даведаўся, што з яе пачалі здымаць наяўнасць з дзевяці гадзін раніцы. Заяву ў міліцыю мужчына напісаў пасля таго, як з'ездзіў у Расею і заблакаваў карту. За гэты час у яго зніклі блізу 5 тысяч даляраў.

Супрацоўнікі аддзела ў раскрыцці злачынстваў у сферы высокіх тэхналогій УУС канфіскавалі запісы з камер відэаназірання банкаматаў і вуліц горада і пачалі шукаць падазраванага. Ім аказаўся той самы таксіст, ні разу не судзімы 35-гадовы магілёвец.

- Са слоў таксіста, пасажыр згубіў карту ў машыне, - успамінае Андрэй Нікіцін. - Кіроўца вярнуўся ў Магілёў і на працягу чатырох дзён аб'язджаў банкаматы, пакуль не спустошыў карту цалкам. У кожным ён здымаў па ліміту 200 даляраў ЗША і нейкую колькасць беларускіх рублёў.

За крадзеж грошай з выкарыстаннем кампутарнай тэхнікі ў буйнай суме суд прысудзіў мужчыну да штрафу сумаю 100 базавых велічынь (2300 рублёў) і да трох гадоў пазбаўлення волі з адтэрміноўкай на тры гады. Выкрадзеныя грошы часткова канфіскавалі падчас следчых мерапрыемстваў. Астатнюю шкоду абвінавачаны цалкам выплаціў.