«Дайце грошы!»

Беларускія ўлады хочуць «раскулачыць» кожнага.

Ва ўсёй краіне сёння ідуць затрымкі заробкаў, масавыя скарачэнні, перавод прадпрыемстваў на няпоўны працоўны тыдзень. І адначасова - бесперапынны рост коштаў спажывецкіх тавараў і тарыфаў ЖКГ. Пра настроі людзей у рэгіёнах распавёў у інтэрв'ю Charter97.org аўтар відэаблога «Народны рэпарцёр» з Берасця Сяргей Пятрухін.

- Недалёка ад Берасця, у Івацэвічах, будуюць льготнае жыллё старшыні райвыканкама, а не шматдзетным сем'ям. Вы чулі пра гэта?

- Такая праява беззаконня ад уладаў у нашай краіне - ужо даўно не навіна. Чыноўнікі будуюцца паўсюдна. Я дакладна ведаю, што старшыня выканкаму ў Івацэвічах будуе сабе жыллё, хоць у яго ўжо ёсць службовае.

А з нагоды шматдзетных сем'яў хачу сказаць: гэта ўжо даўно не льготная катэгорыя насельніцтва. Хутчэй - наадварот. Гэта цяпер людзі, да якіх найперш прыходзяць адключаць электрычнасць ці прыцягваць да адказнасці паводле дэкрэта №18. Ніякага «клопату дзяржавы» пра шматдзетныя сем'і даўно ўжо не засталося.

Для гэтай катэгорыі сем'яў захавалася толькі адная назва з мінулага, а ніякай сацыяльнай палітыкі ўлады і блізка не праводзяць. Я ведаю значна больш выпадкаў, калі шматдзетным сем'ям дапамагалі актывісты, незалежныя блогеры, проста неабыякавыя людзі, але не дзяржава.

- Учора стала вядома, што ў Менску рабочых адпраўляюць у выправу ў Расею, а кампенсацыю за выправу плацяць утрая меншую, чым трэба паводле закона. Ці былі аналагічныя выпадкі ў Берасці?

- У Берасці пра такія выпадкі не чуў, тут не так развітая практыка выпраў у Маскву. Затое квітнее іншая з'ява: проста не плацяць поўны заробак, скарачаюць людзей, якія не падаўжаючы кантракты, пераводзяць прадпрыемства на няпоўны працоўны тыдзень.

Вось гэтага «дабра» стае з гакам, увесь час даводзіцца чуць ад людзей гісторыі пра скарачэнні. Усе прадпрыемствы нават не пералічу, настолькі часта гэта адбываецца. Пачалося ўсё з самых буйных нашых «флагманаў» - завода дываноў, «панчошнага», потым і астатнія «падцягнуліся».

- Людзі апынаюцца на вуліцы або атрымліваюць смешныя грошы за няпоўны працоўны тыдзень, а рахункі ўсё адно трэба аплачваць... Нават больш, чым адразу - бо тарыфы на ЖКГ з верасня паднялі. Як доўга такое будзе прадаўжацца?

- Абурэнне людзей вераснёўскай «камуналкай» пакуль толькі на падыходзе - бо за яе яшчэ не прыйшлі рахункі. А вось што ўжо цяпер вельмі раздражняе народ - гэта непразрыстасць нашай сістэмы ЖКГ. Непразрыстасць - гэта яшчэ мякка кажучы. Вось з нагоды гэтага я вельмі часта чую абурэнне людзей. Немагчыма нічога даведацца: што колькі каштуе, куды колькі мы рэальна плацім.

А рост камунальных паслуг будзе, пакуль ёсць гэтая ўлада і яе «падыходы» да народа. Глядзіце самі: грошай у краіне няма і іх аднекуль трэба браць. Вось і бяруць - усялякімі шляхамі, адусюль, дзе толькі можна. У ход ідуць штрафы, падвышэнне тарыфаў ЖКГ, платныя група прадоўжанага дня ў школах з раніцы. Адусюль, дзе можна нешта выцягнуць - бяруць грошы. Усе льготы ў краіне зрэзаныя, «ільготнікаў» як такіх ужо не засталося. І працягвацца гэта будзе, пакуль «ладзіць баль» гэтая ўлада. І чым далей - тым больш будзе пабораў.

Бо як усё пачыналася? Спачатку пачалі «душыць» тых, хто багацейшы. Потым перакінуліся на тых, хто менш багаты. І так на зніжэнне ўлады дойдуць да кожнага. Ужо дайшлі да многіх! Работы ж няма ў людзей і заробку няма - дык іх запісваюць у «дармаеды» і абкладаюць падаткам.

Пачалі «раскулачваць» прадпрымальнікаў, а калі тыя пазакрываліся або з'ехалі з краіны - спускаліся па сацыяльнай лесвіцы ўсё ніжэй і ніжэй. І вось што мы маем: трэба плаціць у скарбніцу ўжо тым, хто не мае працы, бо што ўлады не ствараюць працоўных месцаў і не прыцягваюць інвестыцыі.

Ды яны і не могуць нічога ствараць, бо падыход у іх адзін: «Дайце грошай!». «Дайце, бо мы хочам гэтак жа добра жыць, як ужо прызвычаіліся. А вы там выжывайце, як у вас атрымаецца», - вось так размаўляе гэтая ўлада з народам.

- Беларускі Нацыянальны Кангрэс абвясціў на 20 кастрычніка «Марш абураных беларусаў 2.0». Ці будуць, на вашую думку, у Берасці такія ж пратэсты, як увесну гэтага года?

- Чакаю, што людзі выйдуць на вуліцы. Гатовы дапамагаць інфармацыйна і здымаць відэа з народнымі пратэстамі. Я ж журналіст.