Марцін Шульц выклікаў Ангелу Мэркель на «дуэль»

Кандыдат ад Сацыял-дэмакратычнай партыі Нямеччыны хоча абмеркаваць тэмы, якія не былі закрануты ў першай тэледуэлі.

У лісце да Мэркель ейны галоўны апанент у барацьбе за пасаду канцлера ФРГ выказаў жаданне падчас паўторных дэбатаў абмеркаваць тэмы, якія не былі закранутыя ў першай тэледуэлі, піша DW.

Кандыдат у канцлеры ад Сацыял-дэмакратычнай партыі Нямеччына (СДПН) Марцін Шульц (Martin Schulz) за паўтары тыдні да выбараў у бундэстаг выявіў жаданне правесці яшчэ адну тэледуэль з кіраўніцай урада краіны Ангелай Мэркель (Angela Merkel). У эфіры праграмы Klartext грамадска-прававога тэлеканала ZDF ўвечары ў аўторак, 12 верасня, Шульц заявіў, што падчас першых дэбатаў з Мэркель, 3 верасня, многія тэмы, якія цікавяць грамадзян Нямеччыны, нават не былі згаданыя. "Я напісаў спадарыні Мэркель ліст, у якім прапанаваў ёй правесці са мной яшчэ адну тэледуэль, каб мы здолелі абмеркаваць гэтыя пытанні", - паведаміў кандыдат ад СДПН.

Мэркель не пагодзіцца на другую тэледуэль

Асноўнымі тэмамі першай тэледуэлі Ангелы Мэркель і Марціна Шульца былі міграцыйны крызіс, працэс інтэграцыі, а таксама палітыка Нямеччыны ў дачыненні да Турцыі. Такія пытанні, як пенсійная рэформа, адукацыя, лічбавыя тэхналогіі або стасункі з Расеяй не абмяркоўваліся. Са слоў Шульца, у лісце да Мэркель ён адзначыў, што канцлерка самая наракала на абмежаваны выбар тэм. "Грамадзяне Нямеччыны маюць права стаць сведкамі разгорнутай дыскусіі аб асноўных пытаннях,якія вызначальныя для будучыні нашай краіны. Зыходзячы з гэтага, я прапаную правесці другую тэледуэль перад выбарамі ў бундэстаг. Я гатовы ўдзельнічаць у ёй ва ўсялякую часіну", - падкрэсліў Шульц.

імавернаасць, што Ангела Мэркель адкажа апаненту згодай, невялікая, бо канцлерка ўжо выказалася супраць паўторных тэледэбатаў, піша агенцтва dpa. Сваё нежаданне Мэркель абгрунтавала тым, што выбарчая сістэма ў Нямеччыне не мае наўпроставых выбараў кіраўніка ўрада. "На фоне перадвыбарчай барацьбы, якую вядуць больш дробныя партыі, завастраць увагу выбарцаў на тэледуэлі толькі двух кандыдатаў можна толькі ў якасці выключэння", - мяркуе канцлерка ФРГ.

Блок Мэркель утрымлівае пазіцыі

Дэбаты ў жывым эфіры 3 верасня станоўча адбіліся на рэйтынгу Ангелы Мэркель. Калі б выбары канцлера ФРГ былі наўпроставымі, яна набрала б 54 адсоткі галасоў, палепшыўшы свой ранейшы вынік адразу на 5 адсоткавых пунктаў. Пазіцыі Марціна Шульца не змяніліся: за яго гатовыя прагаласаваць 26 адсоткаў рэспандэнтаў.

Між тым, паводле апошняга апытання, праведзенага сацыялагічным інстытутам Forsa, рэйтынг партыі Ангелы Мэркель - Хрысціянска-дэмакратычнага уніі (ХДУ) - і яе партнёраў з баварскага Хрысціянска-сацыяльнага звязу (ХСЗ) складае 37 адсоткаў, тады як сацыял-дэмакратаў - 23 адсоткі.