Беларусаў прымусяць развязваць «камунальныя рэбусы»

Льготныя тарыфы даражэюць, а ў сумах рахункаў будзе ўсё цяжэй разабрацца.

З 1 верасня ў Беларусі праіндэксавалі кошты прыроднага і звадкаванага газу, а таксама тарыфы на цеплавую і электрычную энэргію. У філіяле «Энэргазбыт» РУП «Менскэнэрга» растлумачылі, як з гэтага месяца змяніліся льготныя тарыфы на электраэнэргію і колькі давядзецца плаціць за перарасход.

Нагадаем, у Беларусі з 1 лютага 2013 года дзейнічаюць дыферэнцыраваныя тарыфы на аплату электрычнасці. Пасля пераходу на яго ў нарматыў укладвалася 83,6 адсотка грамадзян, піша tut.by.

Цяпер дзейнічае трохступеньчатая сістэма тарыфаў у залежнасці ад аб'ёмаў спажывання электраэнэргіі ды газу. Калі спажыванне электраэнэргіі перавышае максімальную норму за месяц па льготных тарыфах, то аплата ажыццяўляецца паводле тарыфаў, якія забяспечваюць поўную кампенсацыю эканамічна абгрунтаваных затрат на іх наданне.

Так, абаненты, якія пражываюць у дамах з электраплітамі, аплачваюць электраэнэргію адпаведна з тарыфамі для насельніцтва (субсідаванымі) пры штомесячным спажыванні да 250 кВт•г. У дамах з газавымі плітамі адпаведна з тарыфамі для насельніцтва аплачваюцца аб'ёмы да 150 кВт•г.

Адпаведна з субсідаванымі тарыфамі (0,1094 руб/КВт•г) па-ранейшаму будуць аплачваць электраэнэргію беларусы, якія пражываюць у жылых дамах (кватэрах) з усталяванымі электраплітамі і якія спажылі за месяц не больш за 250 кВт•г. За спажытую электраэнэргію ў прамежку ад 250 да 400 кВт•г трэба будзе заплаціць адпаведна з субсідаваным тарыфам, але з падвышаным каэфіцыентам 1,3 - 0,1422 руб/КВт•г (але не больш за тарыф, які забяспечвае поўную кампенсацыю эканамічна абгрунтаваных затрат). Тыя ж беларусы, якія пражываюць у жылых дамах (кватэрах) з усталяванымі электраплітамі і спажываюць больш за 400 кВт•г, будуць аплачваць адпаведна з поўным тарыфам 0,19 руб/КВт•г.

Тыя, хто пражывае ў кватэрах, не абсталяваных электраплітамі, адпаведна з ільготным тарыфам 0,1287 руб/КВт•г змогуць спажываць да 150 кВт•г на месяц. Для тых, хто перавысіць гэтую норму да 300 кВт•г, будзе дзейнічаць павышаючы каэфіцыент 1,3.

Зменяцца тарыфы таксама для дамоў, якія не абсталяваныя электраплітамі, цэнтральным гарачым водазабеспячэннем і прыродным газам.

Нагадаем, у Беларусі прапануюць увесці новыя дыферэнцыраваныя тарыфы на электрычнасць для насельніцтва. З такой ініцыятывай раней выступіў Міхаіл Мясніковіч.

На ягоную думку, дыферэнцыяванымі тарыфамі ў Беларусі трэба займацца больш глыбока і больш актыўна прапагандаваць іх выкарыстанне сярод насельніцтва. Так званы тарыфны сшытак, адзначыў ён, павінна быць больш аб'ёмным, ступень дыферэнцыяцыі - большай. «У чалавека павінна быць магчымасць скарыстацца ільготным тарыфам цягам дня ці тыдня, каб выконваць энэргазатратнасць працы дома. Тое ж - для прамысловых прадпрыемстваў», - заявіў Міхаіл Мясніковіч.

Энэргетыкі нагадалі, што аплачваць спажытую электрычную і цеплавую энэргію за кожны мінулы месяц трэба не пазней за 25-га чысла наступнага за ім месяца на падставе аплатнага дакумента, які выдаецца на папяровым носьбіце і (або) у электронным выглядзе не пазней за 15-га чысла месяца, наступнага за разліковым.

Спецыялісты таксама нагадалі, што цалкам кампенсуюць выдаткі на электра- і цеплазабеспячэнне ў тым ліку:

уласнікі кватэр, у якіх ніхто не зарэгістраваны;

тыя, хто выкарыстоўвае жылое памяшканне пад прыватнае ўнітарнае прадпрыемства або пад прадпрымальніцкую дзейнасць, звязаную з прадстаўленнем месцаў для кароткатэрміновага пражывання;

тыя, хто карыстаецца паслугамі электразабеспячэння на будаўнічых пляцоўках пры ажыццяўленні індывідуальнага жыллёвага будаўніцтва на выдадзеных грамадзянам зямельных надзелах.