Праспект Незалежнасці перакрылі на чатыры гадзіны праз кіно
10- 13.09.2017, 20:28
- 36,285
На праспекце Незалежнасці ў Менску здымалі сямейную меладраму.
У сераду на праспекце Незалежнасці ў Менску здымалі адну з фінальных сцэн «Тум-Пабі-Дум». Украінскі актор Арцём Венгеровіч, які выконвае галоўную ролю, выбіраецца з аўтамабіля, трымаючы ў руках партрэт маладой жанчыны, і цудам адхінаецца ад джыпа, які праязджае ў суседнім шэрагу. Затым ён бяжыць у бок дзіцячай клінікі (ёю стала адно з аддзяленняў банка). На супрацьлеглым баку дарогі хлопец заўважае на зямлi жанчыну, піша kp.by.
Здымкі некалькіх сцэн ідуць інтэнсіўна - трэба паспець, пакуль супрацоўнікі ДАІ перакрываюць плынь руху аўтамабіляў. На вуліцы Першамайскай праз кіно ўтварыўся вялізны затор. Пешаходы таксама аказаліся закладнікамі здымачнага працэсу: праходы на пляцоўку перакрылі стужкай.
- Што тут адбываецца? Кіно здымаюць? А дзе акторы? - цікавіцца бялявая пенсіянерка ў чорна-белым кардыгане.
- Засталося 7 хвілін! Сыдзіце усе за кут! Тэрмінова! - злуюцца кіношнікі на людзей, што спрабуюць патрапіць у кадр.
- Вар'яцкі дом нейкі, - жанчына разводзіць рукамі, але паслухмяна заварочвае на вуліцу Захарава.
Здымкі пачаліся ў ліпені, а ўжо ў канцы года фільм абяцаюць паказаць гледачам на шырокім экране.
- Гэта добрае сямейнае кіно. Галоўны герой - 10-гадовы Санёк з дзіцячага дома. Ён разумее, што знаходзіцца ва ўзросце, калі шанцаў на ўсынаўленне ў яго ўжо практычна няма. Таму ён вырашае знайсці ўсынавіцеляў для сябе і сяброўкі Алесі. Санёк дае абвестку: «Маладое дзіця без шкодных звычак шукае сям'ю». Па ходзе дзеяння фільма ён сустракаецца са мноствам людзей, якія паказваюць сённяшнія рэаліі. Мы пазнаем сябе ў гэтых дарослых, хтосьці зразумее, што так рабіць нельга, або, наадварот, возьме з кагосьці прыклад. Фільм прымусіць паглядзець на сябе з боку, - кажа прэс-сакратарка "Беларусьфільма" Юлія Бальшакова.
Ролю галоўнага героя выконвае пераможца шоў «Украіна мае талент. Дзеці-2». Арцём родам з Адэсы. Вячаслаў Нікіфараў абраў яго з тысячы дзяцей з Украіны, Расеі і Беларусі. Кастынг быў вельмі складаным, але рэжысёр задаволены хлапчуком. Алесю гуляе беларуска Даша Кірэева. У карціне задзейнічаны таксама беларускія актор Павал Харланчук, Валерыя Арланава і Сяргей Чэкерэс.