На фабрыцы «Каштан» узбунтавалася цэлая змена

Работніцы «Каштана» гатовыя змагацца да канца за чалавечыя ўмовы працы.

Цэлую змену прыватнага прадпрыемства «Каштан» наймальнік пагражае звольніць за тое, што работнікі шкоднай вытворчасці запатрабавалі паводле закона выдаць спецвопратку і малако за шкоднасць.

Да гомельскага юрыста прафзвязу РЭП Леаніда Судаленкі звярнулася па кансультацыю цэлая змена, шэсць чалавек, з прыватнага замежнага прадпрыемства «Каштан» з свабоднай эканамічнай зоны ў Гомелі.

«Каштан» называецца «прызнаным лідарам у вытворчасці сучаснага пластыкавага пакавання»; там вырабляюць латкі для яйкаў, скрынкі для тартоў, салатаў, марозіва і г.д .; згодна з усімі параметрамі праца з хімічнымі рэчывамі - шкодная вытворчасць. Работніцы «Каштана» сталі патрабаваць адпаведных умоў працы і сутыкнуліся з супрацівам наймальніка.

Леанід Судаленка распавёў praca-by.info пра сутнасць праблемы:

- На «Каштане» людзі працуюць у тры змены; праца з пластыкам - шкодная вытворчасць. Рабочыя сталі патрабаваць сабе спецвопратку, малако за шкоднасць - і паскардзіліся інспектару па працы ў Дэпартамент працы і сацабароны. А начальнік цэха, даведаўшыся пра гэта, падрыхтаваў ад іх імя заяву ў Дэпартамент: «Пададзеная намі скарга ў адказе не мае патрэбы». Уся змена, усе шэсць чалавек адмовіліся падпісваць гэтую заяву. І кожная з работніц ужо атрымала паведамленне пра непадаўжэнне кантракту.

Прававы інспектар прафзвязу падкрэсліў, што галоўнае ў гэтай справе - не прымусіць наймальніка падоўжыць кантракты, тым больш, што гэта немагчыма паводле сённяшняга заканадаўства:

- Працаваць на «Каштане» ім ужо не дадуць, гэта дакладна. Але жанчыны хочуць звольніцца на патрабаванне работніка, а не праз заканчэнне кантракту: у першым выпадку наймальнік выплачвае дапамогу сумай тры аклады. Вось за гэта і трэба будзе пазмагацца. Я спытаў: ці ёсць на іх прадпрыемстве прафзвяз? Прафзвязу няма! Што ж, значыць, уступайце ў РЭП, і наш прафзвяз будзе абараняць вашы правы. Хіба гэта справядліва: работніцы запатрабавалі нармальных умоў працы, а іх выкідаюць на вуліцу. Яны таму гатовыя ісці да канца.