Жыхары менскай вуліцы Розы Люксембург: Мы супраць рассялення невядома куды

Жыхары сталічнага раёна, які рыхтуюць пад зруйнаванне, не прыйшлі да кампрамісу з уладамі.

У адміністрацыі Маскоўскага раёна падвялі вынікі рэзананснага грамадскага абмеркавання рэканструкцыі раёна вуліцы Розы Люксембург. Праект прадугледжвае зруйнаванне да 2030 года 2-3-павярховай забудовы (у агульнай складанасці 1587 кватэр агульнай плошчай 61,2 тыс. кв. м) паміж праспектам Дзяржынскага і вуліцай Харкаўскай. Частка мясцовых жыхароў падтрымала планы архітэктараў (ёсць людзі, якія дзесяцігоддзямі чакаюць зруйнавання), але многія выступілі супраць прымусовага рассялення невядома куды. На днях раённая адміністрацыя размясціла на сваім сайце пратакол падвядзення вынікаў абмеркавання, піша onliner.by.

Як лічаць у Камітэце архітэктуры і горадабудаўніцтва Менгарвыканкама, малапавярховыя дамы ў раёне вуліцы Розы Люксембург не ўяўляюць каштоўнасці для горада, пры гэтым займаюць каштоўную ў горадабудаўнічым сэнсе тэрыторыю. Іх зруйнаванне было зацверджанае яшчэ папярэднімі рэдакцыямі генеральнага плана Менска. Архітэктары прапануюць вылучыць тэрыторыю аднаму буйному забудоўшчыку. Акрамя новага жылля тут павінны з'явіцца два дзіцячыя садкі, дзве школы, паліклініка, грамадска-жылы комплекс і ФАК. Пяціпавярхоўкі захаваюць і капітальна адрамантуюць. Да 2030 года жыллёвы фонд раёна павялічыцца прыкладна на 3633 кватэры. Такім чынам «Розачку» давядуць да паказчыкаў высакашчыльнай забудовы (з цяперашніх 4800 кв. м на гектар да 8300 кв. м на гектар).

Камісія, падводзячы вынікі абмеркавання, складалася з 9 чалавек: прадстаўнікі адміністрацыі Маскоўскага раёна і Менгарвыканкама, дэпутат, архітэктар «Менскграда», прадстаўнік Цэнтра гігіены і эпідэміялогіі, а таксама трое мясцовых жыхароў.

У выніковым пратаколе адзначана, што падчас абмеркавання паступілі два калектыўныя звароты: першае за рэалізацыю праекта (74 подпісы), другое - супраць (51 подпіс). У часопісе заўваг і прапаноў пакінута 37 запісаў, з іх 14 супраць праекту (180 подпісаў) і 23 запісы з рознымі заўвагамі па праекце.

Большасцю галасоў камісія наважыла рэкамендаваць праект для далейшага праходжання экспертызы і зацвярджэння ва ўстаноўленым парадку. Асобныя думкi мясцовых жыхароў, якія ўваходзілі ў склад камісіі, прымацаваныя да выніковых пратаколаў. Прадстаўнікі ініцыятыўнай групы жыхароў, між іншым, уважаюць, што праект рэканструкцыі не адпавядае ні палажэнням генеральнага плана, ні інтарэсам, якія тут жывуць.

Канчатковае рашэнне з нагоды перспектыў сталічнай «Розачкі» будзе прымаць горадабудаўнічая рада пры галоўным архітэктары Менска.