На фэст «Камяніца» прыехалі тысячы людзей

У Музеі народнай архітэктуры і побыту ў Строчыцах прайшоў чарговы фольк-фэст.

Здавалася, увесь Менск суботнім вечарам 17 верасня перасунуўся сюды. На «Камяніцу» прыехалі велізарныя грамады моладзі, сем'і з дзецьмі, людзі сярэдняга веку - публіка разнастайная. Шмат хто быў адзеты ў вышыванкі і нацыянальныя строі, піша kp.by.

Уздоўж дарогі, якая вядзе да сцэны, размясціліся рамесніцкія намёты з разнастайнымі вырабамі ручной працы. Свае творы прэзэнтавалі мастакі.

На фэсце была процьма забаў як для дзяцей, так і для дарослых. Можна было навучыцца страляць з лука або пнеўматычнай зброі. Ганчар вучыў дзяцей рабіць вазачкі з гліны на ганчарным коле. Самыя маленькія госці фэсту скакалі на батуце, прышпіленыя да гумкі, размалёўвалі карцінкі рознакаляровым пяском. Таксама працаваў скаладром.

- Удзень людзей было менш, а пад вечар сталі падцягвацца, - распавядае прадавец аднога з намётаў. - Бракуе рук, каб усіх абслужыць.

Чэргі сапраўды вялікія, але прасоўваюцца даволі хутка. Людзі куплялі гарачую кукурузу, шашлыкі, бульбяныя чыпсы на палачцы, печыва, гарбату ды іншыя прысмакі.

Але больш за ўсё людзей было ля сцэны. Хтосьці стаяў, больш прадбачлівыя людзі ўзялі з сабой пледы, раскладныя крэслы, каб можна было прысесці.

Галоўнымі выстуроўцамі фэсту сёлета былі ўкраінскі электрафольк-гурт «Onuka» (назва перакладаецца з украінскай мовы «Унучка»), калектыў «Theodor Bastard» з Расеі, беларускі гурт «Shuma», і яшчэ адзін украінская гурт «The Doox». Таксама на галоўнай сцэне выступалі беларускія гурты «Нагуаль», «Shaman Jungle» і «Варган».

Пад вечар прыкметна пахаладнела, але люд не разыходзіўся - усе чакалі выступу «Onuka». Парачкі абдымалі адзін аднаго, хтосьці хутаўся ў пледы. Самыя смелыя адышлі крыху далей ад натоўпу ля сцэны і актыўна танцавалі.

- Я ўпадабала гурт «Onuka» з тых часоў, як некалькі гадоў таму ўпершыню пачула іх жыўцом, - распавядае мянчанка Вольга. - Не прапускаю ніводнага канцэрту. Ад іх ідзе такая шалёная энэргетыка, у іх столькі імпэту.

На жаль, гурт «Shuma» так і не выступіў. Шмат хто ехаў на фэст менавіта для таго, каб паслухаць гэты калектыў, і злёгку засмуціўся. Музыкі напісалі на сваіх старонках у сацыяльных сетках, што праз затрымкі проста не паспелі выступіць.

Нягледзячы на тое, што фэст скончыўся а 22:20, а не а 22:00, як планавалася, і дабірацца ад пляцоўкі да Менска не надта зручна, шмат хто заставаўся да канца.