Уладзіміру Някляеву на Акрэсціна не дазваляюць карыстацца асадкай
7- 18.09.2017, 20:38
- 18,222
Сям'я аднаго з лідараў БНК дагэтуль не ведае падрабязнасцяў затрымання і прычыны арышту палітыка.
Вольга Някляева, жонка аднаго з лідараў Беларускага Нацыянальнага Кангрэсу Уладзіміра Някляева, сёння аднесла перадачу мужу ў Цэнтр ізаляцыі правапарушальнікаў на Акрэсціна, паведамляе «Радыё Свабода».
Паэт і палітык перастаў выходзіць на сувязь з раніцы 15 верасня. Пазней Вольга Някляева даведалася ад дзяжурнага адваката з суда Савецкага раёна Менска, што ён быў затрыманы і асуджаны на сем дзён адміністрацыйнага арышту.
Раней Уладзімір Някляеў скардзіўся на стан свайго здароўя, між іншым на падвышаны ціск.
«Я спытала пра гэта, мяне запэўнілі, што ціск нармальны, таблеткі даюць, - сказала Вольга Някляева. - Адзінае, чаго, па маёй інфармацыі, зноў пазбавілі, - гэта асадкі. Перадала сёння аловак, паглядзім, данясуць ці не. Прынамсі ўзялі...»
З гэтай прычыны зняволены паэт не змог напісаць дадому ніводнага ліста, а Вольга Някляева дагэтуль не ведае падрабязнасцяў затрымання і прычыны пакарання мужа.
«Ды не, адкуль жа я магу ўзяць гэтыя падрабязнасці? - наракае жанчына. - Толькі ад яго. Сёння таксама паспрабуе да яго прабіцца адвакат, але невядома, дапусцяць ці не. Можа, тады і з'явяцца нейкія новыя дэталі».
Уладзіміра Някляева арыштавалі за ўдзел у Акцыі папярэджання 8 верасня ў Менску супраць расейска-беларускіх вайсковых вучэнняў «Захад-2017». Арганізатарам пратэсту быў Беларускі Нацыянальны Кангрэс.