Арменія дапусціла вяртанне Азербайджану часткі Карабаха

Гаворка ідзе пра тэрыторыі, якія не маюць стратэгічнага значэння.

Міністр замежных спраў Арменіі Эдвард Налбандзян заявіў, што Азербайджан і Арменія ў рамках карабахскага ўрэгулявання абмяркоўваюць магчымасць вяртання тэрыторый, якія не пагражаюць бяспецы Карабаха, паведамляе АМІ «Навіны-Арменія».

«Не думайце, што мы можам камусьці наіўна паверыць і проста так нешта аддаць. Кажучы пра вяртанне, я сказаў, што гаворка ідзе пра тыя тэрыторыі, якія з пункту гледжання бяспекі не стануць пагрозай для Карабаха і развязання пытання», - заявіў Налбандзян падчас форуму «Арменія-Дыяспара».

Ён таксама адзначыў, што пазіцыя армянскай стараны аб ўрэгуляванні канфлікту не змянілася. Паводле ягоных слоў, «калі б прызнаннем Карабаха Арменіяй неадкладна развязаліся ўсе пытанні, яна даўно б гэта зрабіла».

«Але рэч у тым, што ідуць перамовы, і мы хочам мірным шляхам і разам з міжнароднай грамадскасцю развязаць гэтае пытанне. У гэтым плане ёсць прагрэс», - падкрэсліў Налбандзян.

Міністр замежных спраў Нагорнага Карабаха Карэн Мірзаян заявіў, што Сцепанакерт выступае катэгарычна супраць здачы якіх-небудзь тэрыторый Азербайджану, паведамляе Verelq.am.

У красавіку 2016 гады адбылося наймацнейшае за апошнія 20 гадоў абвастрэнне карабахскага канфлікту. За некалькі дзён супрацьстаяння загінулі больш за 30 чалавек, блізу 200 пацярпелі.

Незалежнасць ад Азербайджана Нагорны Карабах абвясціў ў 1991 годзе. Пасля няўдалай сілавой аперацыі Баку для вяртання кантролю над рэгіёнам ў 1994 годзе быў падпісаны бішкецкі пратакол аб замірэнні паміж Азербайджанам, Арменіяй і Нагорна-Карабахскай Рэспублікай, аднак на лініі судакранання перыядычна адбываюцца інцыдэнты.

Паводле звестак ААН, у зоне канфлікту жывуць 150 тысяч чалавек.