Прадпрымальнікаў будуць раскулачваць «па-новаму»

Улады прыдумалі новыя спосабы, як канфіскоўваць тавар і «раздаваць» штрафы.

У Беларусі зменяць падыходы да канфіскацыі тавараў. Пра гэта паведаміў сёння дырэктар Нацыянальнага цэнтра заканадаўства і прававых даследаванняў Вадзім Іпатаў пасля сустрэчы з Аляксандрам Лукашэнкам. На ёй абмяркоўваўся законапраект аб унясенні змяненняў і дапаўненняў у Кодэкс аб адміністрацыйных правапарушэннях і Працэсуальна-выканаўчы кодэкс аб адміністрацыйных правапарушэннях, піша БелТА.

«Гэты законапраект - сістэмны, комплексны. Ён прадугледжвае карэктаванне адміністрацыйнай адказнасці ў розных сферах. Вялікі блок туды ўключаны аб лібералізацыі бізнэсу, - адзначыў Вадзім Іпатаў. - Важны момант - гэта пытанне канфіскацыі. Бізнэс-супольнасць увесь час уздымае гэтае пытанне і кажа пра тое, што залішнюю жорсткасць выкарыстоўвае дзяржава ў частцы выкарыстання гэтага адміністрацыйнага спагнання».

Плануецца, што сфера выкарыстання канфіскацыі будзе істотна скарочаная, а абавязковая канфіскацыя захаваецца толькі ў дачыненні да забароненых да абарачэння рэчаў: экстрэмісцкіх матэрыялаў, фальсіфікаванага алкаголю, забруджанай радыёнуклідамі звыш дапушчальных узроўняў або недабраякаснай прадукцыі, здольнай пацягнуць захворвання або атручванне людзей.

«Прадугледжваецца, што цалкам увесь даход не будзе канфіскоўвацца, як гэта робіцца цяпер, у дачыненні да, напрыклад, незаконнай прадпрымальніцкай дзейнасці. Будзе ўсталяваны пэўны адсотак гэтага даходу, - растлумачыў дырэктар цэнтра. - Акрамя таго, у шэраг нормаў уводзіцца альтэрнатыўная канфіскацыя. У гэтай сітуацыі будзе прымаць пастанову суд, узважваючы ўсе абставіны справы і характар правапарушэння».

Дакумент таксама прадугледжвае зніжэнне сумы штрафаў паводле 45 адміністрацыйных правапарушэнняў і пашырэнне магчымасці выкарыстання альтэрнатыўнага захаду - папярэджання. Мяркуецца, што яно будзе ўведзенае ў 21 норму аб адказнасці. У ліку новаўвядзенняў, прапанаваных законапраектам, - дакладныя крытэрыі вызначэння малазначнасці адміністрацыйнага правапарушэння ў дачыненні да суб'ектаў гаспадарання і прадпрымальнікаў.

«Шэраг дзяржаўных органаў разам з нашым цэнтрам узялі актыўны ўдзел у дапрацоўцы гэтай нормы, - сказаў Вадзім Іпатаў. - Суб'ект гаспадарання будзе прыцягвацца да адміністрацыйнай адказнасці толькі ў выпадках учынення шкоды жыццю і здароўю насельніцтва, істотнай маёмаснай шкоды - больш за 40 базавых адзінак. Гэта кошт прадмета адміністрацыйнага правапарушэння, сума даходу або шкода, які можна палічыць».

Нормы аб малазначнасці будуць выкарыстоўвацца ў дачыненні да адміністрацыйных правапарушэнняў, якія ўтрымліваюцца ў 11-14 раздзелах КоАП. У іх ліку - правапарушэнні ў галіне прадпрымальніцкай дзейнасці, супраць парадку падаткаабкладання і мытнага рэгулявання, у сферы фінансаў, рынку каштоўных папер і банкаўскай дзейнасці. Правадыр дзяржавы адобрыў закладзеныя ў законапраекце падыходы і даручыў ва ўстаноўленым парадку распрацаваць пытанне аб унясенні дакумента на разгляд у парламент.

«Тут трэба далучыцца нашым дэпутатам, каб гэты дакумент доўга не затрымліваўся і быў уважліва разгледжаны, узважаныя ўсе «за» і «супраць» да таго карэктавання, што ўключанае ў праект з улікам досведу дэпутатаў», - адзначыў дырэктар цэнтра.

Вадзім Іпатаў звярнуў увагу, што падчас распрацовак законапраекта вывучаўся вопыт іншых дзяржаў.

«Такія краіны, як Малдова, Расія, Казахстан, спрабуюць вырашаць гэтыя пытанні, але такога, што прапісанае ў нашым праекце, яшчэ няма. Прычым закладзены падыход, які характэрны для заходнееўрапейскіх краін. Гэта сапраўды крок наперад і даволі сур'ёзны», - заявіў ён. Работы для паляпшэння бізнэс-клімату ў Беларусі на гэтым не спыняцца, падкрэсліў Вадзім Іпатаў.