У Гомелі прадпрыемства падманула работніка на $7000

Прадпрыемства не заплаціла рабочаму, які тры месяцы быў у камандзіроўцы ў Туркменістане.

На сёння завінавачанасць наймальніка перад працаўніком складае блізу 14 тысяч рублёў. Да разбору ў гэтай гісторыі падключыліся прафзвязы. Праўдзівасць сваіх прэтэнзій гамяльчук пацвердзіў у судзе, але дагэтуль не атрымаў ні капейкі, піша сайт «Свободные новости».

Леанід Лебедзяў пра сваю працу ў Туркменістане ўспамінае не без гонару, усё ж узводзілі важны для краіны аб'ект. Гарлыкскі горна-абагачальны камбінат беларусы пабудавалі за мільярд даляраў, і дзесьці сярод гэтай сумы згубіліся ягоныя сціплыя 14 тысяч рублёў.

Леанід Лебедзяў, пацярпелы: Камандзіровачныя выдаткі, праезд, пражыванне не аплацілі. Сакавік-красавік я быў у адпачынку, таксама не аплацілі. Наважыў звольніцца, і дагэтуль не аплацілі нічога.

Знаёмы параіў Леаніду звярнуцца да прафсаюзных юрыстаў. Пры дапамозе спецыялістаў справу ў судзе мужчына выйграў: парушэнне закона занадта відавочнае, каб можна было чакаць іншага выніку.

Кацярына Філіпцова, галоўны прававы інспектар працы Гомельскага абласнога аб'яднання прафзвязаў: «Наймальнік парушыў усе нормы заканадаўства. Больш за тое, праігнараваў выклікі ў суд: ён не з'явіўся ні на першае, ні на другое судовае пасяджэнне. Арыштаваныя ўсе рахункі гэтага прадпрыемства, накладзеная забарона на выезд кіраўніка за межы Рэспублікі Беларусь. У далейшым мы будзем надаваць Леаніду дапамогу для спагнанні завінавачанасці».

Шукаць грошы Леаніда журналісты адправіліся ў офіс ягонага былога кіраўніка. У прызначаны час у офісе нас сустрэлі толькі зачыненыя дзверы.

Працадаўца, які вінен Леаніду Лебедзяву, зусім не фірма-аднадзёнка. Закрытае акцыянернае таварыства зарэгістраванае на гэты адрас аж з 1994 года. Праўда, сёння офіс пусты. Пагаварыць з дырэктарам фірмы не змаглі ні юрысты прафзвязу, ні здымачная група СТВ. Прызначаная сустрэча так і не адбылася.

Напэўна, у дырэктара фірмы ёсць лагічныя адказы на ўсе пытанні, але пакуль іх ніхто не пачуў.

Леанід жа не губляе веры атрымаць яшчэ і кроўна заробленыя.

Леанід Лебедзяў: «Людзям трэба верыць. Я спадзяюся, што чалавек прыстойны. Павінен разлічыцца».

А тым часам у Федэрацыі прафзвязаў Беларусі канстатуюць зусім несуцяшальную тэндэнцыю. Толькі за першае паўгоддзе 2017 года колькасць тых, хто звярнуўся па бясплатную юрыдычную дапамогу з мэтай спагнаць заробленае павялічылася ўдвая. За гэты час працаўнікам вернута больш за мільён рублёў незаконна ўтрыманых або нявыплачаных грашовых сум.