У аэрапорце ў Маскве затрымалі сямейную пару з Беларусі

Шлюбная пара хавалася ад крымінальнага пераследу ў Камбоджы.

У маскоўскім аэрапорце «Шарамеццева» затрымалі шлюбную пару з Беларусі, якая хавалася ад крымінальнага пераследу ў Камбоджы і знаходзілася ў міжнародным вышуку па лініі Інтэрпола, паведамляе прэс-служба МУС Беларусі.

Мужчыну і жанчыну падазраюць у здзяйсненні цяжкіх злачынстваў, прадугледжаных ч. 4 арт. 210 (Крадзеж шляхам злоўжывання службовымі паўнамоцтвамі), ч. 2 арт. 235 (Легалізацыя ("адмыванне") матэрыяльных каштоўнасцяў, набытых злачынным шляхам) і ч. 3 арт. 424 (Злоўжыванне ўладай або службовымі паўнамоцтвамі) Крымінальнага кодэкса Беларусі.

Нягледзячы на прынятыя шлюбнай парай меры канспірацыі, іх перамяшчэння ў свеце кантралявалі супрацоўнікі ГУБАЗіК МУС, паведамляецца на сайце ведамства. Дзякуючы міжнароднаму і міжведамасным узаемадзеянням усталявалі, што яны знаходзяцца на тэрыторыі Камбоджы.

Шлюбную пару затрымала галоўнае аддзяленне міграцыйнага дэпартамента Камбоджы пры садзейнічанні супрацоўнікаў беларускага пасольства ў В'етнаме. Мужчыну і жанчыну дэпартавалі ў Расею, дзе іх затрымалі на памежным кантролі.

Цяпер вырашаецца пытанне аб змяшчэнні іх пад арышт, каб экстрадаваць у Беларусь.

Супраць шлюбнай пары распачалі крымінальныя справы па матэрыялах, сабраных супрацоўнікамі галоўнага ўпраўлення па барацьбе з арганізаванай злачыннасцю і карупцыяй (ГУБАЗіК) МУС. Іх расследуе галоўнае следчае ўпраўленне цэнтральнага апарата СК Беларусі.