МЗС Літвы запатрабавала ад Літоўскага інстытута энэргетыкі перагледзець сваю пазіцыю пра БелАЭС
6- 25.09.2017, 9:47
- 15,939
Пазіцыя Літвы выразная: Будаўніцтва АЭС павінна быць неадкладна спыненае.
Пасля таго як кіраўніцтва Літоўскага інстытута энэргетыкі заявіла, што ўдзел ягоных навукоўцаў у кансультацыях Беларусі наконт АЭС, якая будуецца ў Астраўцы, быў узгоднены з Міністэрствам замежных справаў, апошняе заявіла, што інстытут павінен перагледзець сваю пазіцыю, паведамляе са спасылкай на LETA / BNS "Балтыйскі курс" (пераклад – ej.by).
"З улікам таго, што апошнім часам былі прынятыя законы, у якіх Беларуская АЭС прызнаная небяспечнай і называецца пагрозай нацыянальнай бяспекі, на думку МЗС, інстытут павінен перагледзець сваю пазіцыю", – гаворыцца ў каментарыі міністэрства.
Паводле інфармацыі міністэрства, на сустрэчы з прадстаўнікамі інстытута была выказаная заклапочанасць супрацоўніцтвам з Беларуссю, супрацоўнікаў таксама папярэдзілі пра магчымыя пагрозы.
Між тым кіраўнік Інстытута энэргетыкі Літвы (ІЭЛ) Сігітас Рымкявічус заявіў у інтэрв'ю газеце Lietuvos rytas, што "прадстаўнікі міністэрства зразумелі гэтую місію, з якой можна атрымаць і выгоду – нашы навукоўцы могуць быць надзейнай крыніцай інфармацыі".
Аднак спецыяльны прадстаўнік Літвы ў пытаннях БелАЭС, супрацоўнік МЗС Дарус Дзягуціс сказаў, што яму нічога невядома пра ўдзел літоўскіх навукоўцаў у праекце Еўразвяза (ЕЗ), і рэзка заявіў, што гэта афронт, які зразумець складана: "Пазіцыя Літвы цалкам выразная. Будаўніцтва АЭС павінна быць неадкладна спыненае".
Праект, у якім удзельнічаюць літоўскія навукоўцы, фінансуецца ў рамках праграмы Еўракамісіі "Інструмент ядзернай бяспекі", на якую пэўную частку сродкаў вылучае і Літва. Паводле інфармацыі партала 15 min.lt, кошт праекта складае блізу 3,5 млн еўраў, а ІЭЛ заробіць на ім блізу 100 тысячаў еўраў.