Леў Марголін: Усё жывое ў Беларусі з'явілася не дзякуючы, а насуперак дзяржаве

Чаму маладыя беларусы не могуць рэалізаваць свой патэнцыял.

Беларусі неабходна выкарыстаць патэнцыял моладзі для стварэння новых прадпрыемстваў. Такое меркаванне ў праграме «Карціна свету» ў суботнім эфіры канала «РТР-Беларусь» выказаў прэзідэнт Ісландыі Олафур Рагнар Грымсан. Ці можа падобнае пажаданне быць рэалізаванае ў сучаснай Беларусі – пра гэта эканаміст і прадпрымальнік Леў Марголін піша «Заўтра тваёй краіны».

– Увогуле гэта нармальнае пажаданне, але ў нашых варунках яно абсалютна невыканальнае. Патрэбны стартавы капітал, а ў нас такія адсоткі, што наўрад ці хтосьці рызыкне пад новы праект браць крэдыт.

Але самае галоўнае, што не забяспечаная недатыкальнасць прыватнай уласнасці. Гэта значыць, калі ў гэтага маладога чалавека раптам нешта атрымаецца, не гарантавана, што заўтра да яго не прыйдуць і не забяруць ягоны бізнэс. Вось чаму наша моладзь аддае перавагу таму, каб рэалізоўваць сур'ёзныя ідэі за мяжой.

– Ці шмат у Беларусі моладзі, якая магла б паспрабаваць стварыць сваё прадпрыемства?

– Тут справа ў самай што ні на ёсць здаровай меркантыльнасці. Калі ў чалавека ёсць нейкія задумы, ён хоча сябе рэалізаваць, у тым ліку і ў бізнэсе. Але дзяржава павінна падстаўляць плячо ў выглядзе танных крэдытаў, венчурных фондаў, стартапаў і, самае галоўнае, забяспечыць недатыкальнасць гэтай уласнасці і гарантаваць, што чалавек мае права на памылку.

– Ці зацікаўленая сама дзяржава ў тым, каб нашы маладыя ініцыятыўныя суайчыннікі адкрывалі сваю справу тут, а не за мяжой?

– На словах яна зацікаўленая. Але на справе ўсё жывое, што ў нас ёсць, з'явілася не дзякуючы, а насуперак дзяржаве. Многія з тых, хто пачынаў тут, дасягнуўшы поспеху, імкнуцца перавесці прынамсі цэнтр сваёй дзейнасці ў больш надзейнае месца.