Беларус-алігарх абвешчаны ў Манака персонай нон грата
8- 25.09.2017, 12:00
- 26,296
Прэзідэнт і ўладальнік футбольнага клуба «Манака» можа пакінуць карлікавае княства праз карупцыйны скандал.
Імя этнічнага беларуса Дзмітрыя Рыбалоўлева – мільярдэра з класічным для бізнэсмэна 90-х мінулым, прэзідэнта футбольнага клуба Манака, гарачага калекцыянера шэдэўраў сусветнага мастацтва, – рэгулярна з'яўляецца ў сусветных СМІ, піша «Салідарнасць».
Гэтым разам, паводле інфармацыі выдання Journal du Dimanche, алігарх, які ўклаў у свой клуб блізу 300 мільёнаў еўраў, абвешчаны ў Манака персонай нон грата.
Яго вінавацяць у подкупе чыноўнікаў і высокапастаўленых паліцыянтаў. Адпаведнае судовае разбіральніцтва «супраць неназванай асобы» ў мінулую пятніцу адкрыла пракуратура Манака.
Стасункі з Рыбалоўлевым спынілі і высокапастаўленыя чыноўнікі, і князь Манака Альбер II.
Абнародаванне інфармацыі пра сяброўства з расейскім мільярдэрам нядаўна прывяло да адстаўкі мясцовага міністра юстыцыі Піліпа Нарміно. Паводле звестак СМІ, былога міністра нават узялі пад варту пасля таго, як высветлілася, што ён атрымліваў ад Рыбалоўлева падарункі і гасцяваў у яго швэйцарскай рэзідэнцыі.
Паводле звестак СМІ, алігарх і ягоны асяродак рабілі моцны ціск на следчыя органы і паліцыю Манака з тым, каб накіраваць у выгоднае ім рэчышча следчыя дзеянні ў цяжбе са швэйцарскім арт-дылерам Івам Буўе. Апошні прадаў Рыбалоўлеву блізу чатырох дзясяткаў карцінаў найбуйнейшых мастакоў паводле неабгрунтавана завышаных коштаў.
Сам алігарх у гэты момант знаходзіцца ў адпачынку ў Лос-Анджэлесе і пакуль невядома, ці вернецца назад. Раней «калійны кароль» беспаспяхова спрабаваў атрымаць грамадзянства гэтага княства.