ААН: Расея парушае правы чалавека ў акупаваным Крыме

Міжнародная грамадскасць запатрабавала ад РФ спыніць рэпрэсіі на акупаваным паўвостраве.

У Арганізацыі Аб'яднаных Нацый канстатавалі пагаршэнне сітуацыі з правамі чалавека ў акупаваным Расеяй Крыме. Пра гэта гаворыцца ў дакладзе Управы вярхоўнага камісара ААН у правах чалавека, апублікаваным 25 верасня, піша «Гордан».

«Сітуацыя з правамі чалавека ў Крыме значна пагоршылася ва ўмовах расейскай акупацыі», - адзначае прэс-служба УВКПЧ.

Падкрэсліваецца, што пасля замены ўкраінскіх законаў на расейскія пацярпелі ўсе жыхары Крыма, пры гэтым дзясяткі тысяч крымчукоў пацярпелі праз атрыманне расійскага грамадзянства.

«Былі зафіксаваныя сур'ёзныя парушэнні правоў чалавека, такія як адвольныя арышты і затрыманні, гвалтоўныя знікненні, жорсткае абыходжанне і катаванні і, прынамсі, адно пазасудовае пакаранне», - сказана ў дакладзе.

У ААН заявілі, што ў Крыме маюць месца парушэнні міжнароднага гуманітарнага права і правоў чалавека.

У дакладзе ўтрымліваецца 20 рэкамендацый ураду Расеі з заклікамі выконваць абавязацельствы як акупацыйным уладам, падтрымліваць правы чалавека і эфектыўна расследаваць злачынствы - катаванні, выкраданні і забойствы з удзелам супрацоўнікаў сіл бяспекі і «самаабароны Крыма».

«Няздольнасць расследаваць у судовым парадку гэтыя дзеянні і забяспечыць справаздачнасць пазбаўляе ахвяры належнага сродку прававой абароны і ўзмацняе беспакаранасць, што патэнцыйна заахвочвае прадаўжэнне ўчынення парушэнняў правоў чалавека», - сказана ў дакладзе.

Таксама адзначаецца, што сотні зняволеных і затрыманых да суда былі перададзеныя ў Расейскую Федэрацыю, нягледзячы на тое, што такая практыка строга забароненая міжнародным гуманітарным правам.

Сярод такіх зняволеных - украінскі кінарэжысёр Алег Сянцоў, арыштаваны ў Сімферопалі ў траўні 2014 года і адпраўлены ў РФ у тым жа месяцы, да таго, як яго асудзілі і пасадзілі ў турму строгага рэжыму ў Сібіры.

Пацярпелымі былі праціўнікі рэферэндуму аб далучэнні Крыму да РФ у сакавіку 2014 года, а таксама журналісты, блогеры, актывісты грамадзянскай супольнасці і прыхільнікі Меджліса крымскататарскага народа, які быў абвешчаны ў РФ экстрэмісцкай арганізацыяй. Пад маркай барацьбы з экстрэмізмам улады Расейскай Федэрацыі ў Крыме праводзілі хатнія ператрусы, запалохвалі і затрымлівалі чальцоў крымскататарскай абшчыны, адзначаюць у ААН.

Міністр замежных спраў Украіны Павел Клімкін, анансуючы абнародаванне дакладу ААН, заявіў, што ў ім будуць апублікаваныя факты злачынстваў Расеі ў Крыме. З ягоных слоў, гэты даклад - важны крок у мэтах выканання рэзалюцыі Генеральнай Асамблеі ААН аб парушэнні правоў чалавека на акупаваным паўвостраве.

Расея анэксавала Крым і Севастопаль пасля незаконнага рэферэндуму 16 сакавіка 2014 года. Далучэнне паўвострава да РФ не прызнаецца Украінай і большасцю краін свету.