Выбухі на складзе боепрыпасаў ва Украіне прызналі дыверсіяй
2- 27.09.2017, 12:48
- 16,922
Вайсковая пракуратура распачала крымінальную справу.
Вайсковая пракуратура Украіны кваліфікавала пажар і выбухі на складзе боепрыпасаў паблізу населенага пункта Калінаўка Вінніцкай вобласці як дыверсію. Пра гэта паведаміла ў сераду прэс-сакратарка Службы бяспекі Украіны Алена Гітлянская.
«Вайсковая пракуратура Паўднёвага рэгіёна распачала крымінальную справу паводле артыкула 113 Крымінальнага кодэксу - «дыверсія», - прыводзіць яе словы агенцтва УНІАН. «Нашы супрацоўнікі будуць уваходзіць у склад следчай групы, прадаўжаюцца аператыўныя і следчыя дзеянні», - дадала яна.
26 верасня блізу 22:00 (паводле Менску) у падраздзяленне ДСНС Украіны паступіла інфармацыя аб выбухах боепрыпасаў на вайсковых складах міністэрства абароны, размешчаных паблізу пасёлка Калінаўкі Вінніцкай вобласці. У арсенале, плошча якога складае блізу 60 га, захоўвалася 188 тысяч тон боепрыпасаў. Ратавальнікі эвакуявалі з зоны паражэння больш за 30 тысяч чалавек.