У РФ праз тайфун рака змяніла рэчышча і затапіла горад
12- 5.09.2017, 18:21
- 35,188
Інцыдэнт адбыўся ў Сахалінскай вобласці.
У Сахалінскай вобласці Расеі праз тайфун «Санву» рака змяніла рэчышча і затапіла горад Паўночны-Курыльск.
Мясцовыя ўлады расказалі, што рака затапіла і знесла вялікую колькасць гаражоў і аўтамабіляў. Жыхары паведамляюць пра падтопленыя кватэры на першых паверхах.
Праз непагадзь пашкоджаныя чатыры масты, тры з іх злучаюць горад з аб'ектамі камунальнай інфраструктуры. У раёне ўведзены рэжым надзвычайнай сітуацыі.
«Цыклон прайшоў, дажджы спыніліся, вецер сціх. Але ў нас цяпер сур'ёзныя праблемы. Рака Кузьмінка пры праходжанні тайфуна памяняла рэчышча і ўвайшла ў горад ўздоўж вуліц з жылымі дамамі. Шкоду яшчэ не падлічвалі, але яна ўжо складае некалькі дзясяткаў мільёнаў рублёў», - паведаміў «Интерфакс» віцэ-мэр горада Аляксандр Аўсяннікаў.
З ягоных слоў рака, якая змяніла рэчышча, затапіла і знесла вялікую колькасць гаражоў і аўтамабіляў.
Уся цяжкая тэхніка задзейнічана ў тым, каб вярнуць рэчышча ракі Кузьмінкі і яшчэ адной ракі Матроская ў ранейшыя рэчышчы.
Горад з'яўляецца адзіным населеным пунктам Паўночна-Курыльскага раёна, у ім пражывае 2,5 тысячы чалавек.